Сервер (исм-фамилиялар ўзгартирилган) катта бир корхонанинг бошлиғи. Ўзининг ташкилотчилиги, тартиб-интизомга қатъий риоя этиши, талабчанлиги билан корхонада ҳурмат топган. Инсонни шайтон йўлдан урмасин экан. Халқимизда “Менинг нафсим балодур, ёнган ўтга солодур” деган пурҳикмат нақл бор. Кимки нафсига қул бўлса, охир-оқибат эл олдида уятга қолади.
“149-Mehanizatsiyalashgan ko’chma karvoni” МЧЖ раҳбари Сервер бурютмачи “Сув таъминоти ва оқава сув объектлари қурилиши бўйича ИК” ДУК Самрқанд вилоят ҳудудий бошқармаси билан Самарқанд шаҳрида жойлашган Самарқанд халқаро аэропортидан Даҳбет кўчасигача борувчи оқава сув (канализация) тармоғини тортиш ишларини 3 миллиард 809 миллион 463,1 минг сўмга бажариш ҳақида пудрат шартнома имзолангани ҳамда ушбу шартномага қўшимча келишувлар тузилганлигидан сўнг “фикри” бузилди. Имкониятдан фойдаланиб қолиш учун буюртмачи томонидан жиноий шерик керак эди. “Кўр-кўрни қоронғуда топади” деганларидек шерик ҳам тезда топила қолди. У “Сув таъминоти ва оқава сув объектлари қурилиши бўйича ИК” ДУК Самарқанд вилоят ҳудудий бошқармаси унитар корхонаси бош мутахассиси Ўролбой билан жиноий тил бириктириб, қурилиш ишларини амалга ошириш учун берилган бюджет маблағларини талон-тарож қилишни режалаштириб олишди.
Икки жиноий шерик Самарқанд халқаро аэропортидан Даҳбет кўчасигача борувчи оқава сув тармоғини тортиш ишларини ҳақиқатда бажарилмаган, лойиҳада кўрсатилган бурғулаш ишлари қўлбола усулда бажарилган бўлсада, гўёки лойиҳада кўрсатилганидек бажарилганлиги ҳақидаги сохта ҳужжатларни ҳамда “149-Mehanizatsiyalashgan ko’chma karvoni” МЧЖ томонидан ҳақиқатда 3 миллиард 536 миллион 116,8 минг сўмлик қурилиш ишлари бажарилган бўлсада, жами 95 фоиз ишлар, яъни 3 миллиард 618 миллион 990 минг сўмлик ишлар бажарилганлиги ҳақида сохта маълумотлар ва ҳисоб-фактураларни тайёрлашиб, ушбу бошқарманинг ҳисобхонасига тақдим этишиб, жами 82 миллион 873,1 минг сўмлик бюджет маблағларини ўзлаштириб, талон-тарож қилиб юборишди. Ишлар силлиққина кетаётгандек эди. Бироқ “Қинғир ишнинг қийиғи қирқ йилдан кейин ҳам чиқади” деганларидек бу “иш”нинг кўп ўтмай “миси” чиқди.
Суд судланувчилар С. Элмирзаев ва Ў. Нурмоновларнинг ҳар иккаласини ҳам келтирилган зарарни тўлиқ қоплаганликларини ҳамда қилган ишидан чин кўнгилдан пушаймон эканликларини инобатга олиб, Ўзбекистон Республикаси ЖКнинг 167-моддаси ва 228 –моддасининг тегишли бандлари билан билан айбли деб топиб, жазоларни қисман қўшиш йўли билан узил-кесил ҳар ойлик иш ҳақининг 20 (йигирма) фоизи давлат даромади ҳисобига ушлаб қолинган ҳолда, 2 (икки) йил 2 (икки) ой муддатга ахлоқ тузатиш ишлари жазоси тайинлади.
И.ТУРДИЕВ,
ИЖҚК Департаментининг Самарқанд вилоят бошқармаси бўлим инспектори, 1-даражали юрист.
