Ўт – инсон эҳтиёжлари учун хизмат қилади. У уй-рўзғорни иситиб, таомларни пиширади, инсоннинг бошқа талаблари учун зарур восита. Бироқ, оловдан ниҳоятда эҳтиёткорлик билан фойдаланиш зарур. Озгина эҳтиётсизлик кўплаб нохушликларга сабаб бўлиши, моддий бойлик ва мулкларни кулга айлантириши, энг хавфлиси – инсон ҳаётини хатарга қўйиши мумкин.
Жорий йилнинг 15 ноябридан 15 декабргача мамлакатимизда Ёнғин хавфсизлиги ойлиги деб эълон қилинди. Ойликдан мақсад – иқтисодиёт тармоқлари ва ижтимоий соҳа объектлари, шунингдек, уй-жой фондини ёнғин хавфсизлиги талабларига мувофиқ ҳолга келтириш ҳамда ўта муҳим давлат аҳамиятига молик ёки ёнғин хавфи юқори бўлган объектларда ёнғин хавфсизлиги бўйича комплекс чора-тадбирларни амалга оширишдан иборат.
Туман Фавқулодда вазиятлар бўлими ушбу ойлик муносабати билан барча юридик ва жисмоний шахсларга қарата Мурожаат билан чиқиб, барчани ушбу ойликда фаол иштирок этишга чорлайди. “Сизлардан ушбу тадбирда фаол иштирок этишингизни сўраймиз, дейилади Мурожаатда. Ёнғин хавфсизлиги қоидаларига қатъий риоя қилиб, Сиз нафақат ойликнинг фаол иштирокчисига айланасиз, шунингдек, давлат ва ўз шахсий мулкингизни, уй-жойингизни ёнғиндан асраган, яқинларингиз ва фарзандларингиз хавфсизлигини таъминлаган бўласиз, деб таъкидланади.
Ойлик доирасидаги тадбирларда фаол иштирок этиш ва унинг талабларига риоя қилиш – ўз фойдамизга хизмат қилишини унутмайлик!
Камолиддин ТАНГИРҚУЛОВ,
туман ФВБ бошлиғи ўринбосари, капитан.
