Булунғур шаҳрининг энг гўзал гўшаларидан бири - “Истироҳат боғи”нинг тамал тоши қўйилганига 54 йил тўлиши муносабати билан бугун бу даргоҳда улкан ободонлаштириш ишлари амалга оширилмоқда.
Ҳашар йўли билан амалга оширилаётган бу ишларда 200 нафардан ортиқ ишчи-хизматчилар ғайрат қилишмоқда. Шунингдек, “Тоза ҳудуд”, “Ободонлаштириш” бошқармасининг ишчи ходимлари билан бирга туман маҳаллаларининг ишчилари, Пастдарғом туманиниг Арабхона қишлоғидан ҳашарга келган ҳашарчилар бир ёқадан бош чиқариб меҳнат қилишмоқда. Улар истироҳат боғини бегона ўтлардан тозалаш, қаровсизлик натижасида қуриб қолган дарахтларни кесиб, илдизигача қазиб олиш ишларини амалга оширишмоқда. 
Туман электр тармоқлари ходимлари эскириб, яроқсиз ҳолга келиб қолган симёғочларнинг ўрнига янги темир-бетон устунлар ўрнатишмоқда. Шу боисдан истироҳат боғи кеча-ю кундуз ёруғ бўлиб туради.
5 гектарлик майдонга эга бўлган бу боғда чиройли плиткалардан терилган йўлаклар барпо этилади. 3 та думалоқ шаклдаги жойда гулзор бўлади. Минглаб манзарали дарахтлар экилади. Ўртада энг замонавий фаввора ўрнатилади. 2 та усти ёпиқ суҳбатхона қурилади. Боғ ўртасидан ўтган асфалт йўлнинг ҳар икки томонидаги ҳар бири 300 метрдан иборат бўлган ариқларга замонавий бетон лотоклар ўрнатилмоқда. Ҳордиқ чиқарувчилар учун 100 та ўриндиқлар ўрнатилади. Боғ чеккасида шу кунларда ишга тушиш арафасида турган янги замонавий кўринишга эга бўлган маданият уйининг чиройли биноси “узукка кўз” қўйилгандай ярашиб турибди.
Ҳашарда юрган ишчи-хизматчиларга туманимизнинг “қўли ширин” деб тан олинган ошпазларидан бири Илёс ҳожи Ўсаров бошлиқ ошпазлар эрталабки нонуштадан ташқари икки маҳал иссиқ овқат билан таъминлаб туришибди. Ишчилар дам олишлари ва ётиб туришлари учун “Булунғур” МФЙ биносидан алоҳида жой ажратилган. Ободонлаштириш ишларида Хитой давлатида ишлаб чиқарилган техникалар - бульдозер, эксковатор, кўтарувчи кран каби техникалар беминнат ишламоқда.Раббим ҲОТАМОВ.
