Ўтган асрнинг 1968 йилида ушбу истироҳат боғига асос солинган эди. Шунга ҳам оз эмас - кўп эмас, 50 йил тўлибди. Ўтган давр мобайнида “Истироҳат боғи”, “Ёшлар боғи”, “Чакалакзор”, “Чёрный парк”, “Камолот” номи билан аталган ушбу масканнинг бугунги аҳволига маймунлар йиғлайди. Кексалар, болалар, меҳмонлар учун бу ерда дам олиш учун ҳеч қанақа шароит йўқ.
Боғ ўртасидаги йўлга тўкилган шағал тошлар, тартибсиз қалашиб ётган қурилиш материаллари туфайли бу ердан ўтиш мушкул. Устига устак кечаси шу томонга йўлингиз тушиб қолса борми, боғда сайр қилиб юрган дайди итларга таланишингиз аниқ. Гарчи 2-3 та қийшайиб турган, сими узилган симёғочлар бўлишига қарамасдан, бирорта ҳам ёритиш лампочкаси йўқ. Қисқаси, бу ердан кечаси ўтсангиз, албатта, юрак ҳовучлаб ўтасиз. Бундан ташқари, кундуз кунлари ФҲДЁдан ўтадиган келин-куёвлар машиналари тўлиб кетади. Улар шу боғ четида қурилган “Япон боғи”га музқаймоқ ейишга келишади. Шунингдек, боғ ҳудудида жойлашган Булунғур МФЙ ва “Нуроний” жамғармасига кириш амримаҳол. “Чёрний парк” деб аталаётган бу масканга келган комиссиями, меҳмонми, юқори ташкилот вакилими, қатъий назар, бу масканга кириш учун қонунда ёзилмаган тўсиқларга дуч келади. Бу боғга иш билан ёки тўсатдан кириб қолган машина эгаларидан ноқонуний равишда пул талаб қилиниши ҳаммасидан ортиб тушмоқда.
- Кимга арз қилсанг қилавер, бу ер меники, дарвозани хохласам очаман, хохласам қулфлаб қўяман, - дейди ушбу “Чёрний парк”нинг эгаси Нилуфар Ҳайдарова.
Бу манманликка ким чек қўяди? Қачон бу ердан хотиржам ўтамиз? Шу соҳага мутассадди кишилар нима дейишаркин-а? Ўзи хон, кўланкаси майдон бўлган бу “тадбиркор”ни ким тартибга солади? Агар у тадбиркор бўлса...
Раббим ҲОТАМОВ.
