Халқимизда “Сен ерни боқсанг, ер сени боқади” деган нақл бор. Ҳақиқатдан ҳам туманимизда ер билан тиллашиб, ерга уруғ қадаб, меҳр билан парваришлаб, суғориб, озиқлантириб, мўл ҳосил етиштириб ҳам белгиланган режасини ортиғи билан уддалаб, ҳам оиласи дастурхонини тўкин қилаётган фермер хўжаликлари талайгина. Бироқ... улар орасида ерга кўз олайтираётган, ерга экин экиб фойда топиш ўрнига гарчи қонунга зид эканлигини билсада, ерни сотиб, ноқонуний даромад орттиришни мақсад қилганлари ҳам учраб турибди.
Етмиш ёшни уриб қўйган Турғунбой бобо (исм-фамилиялар ўзгартирилган) ҳозирда 10 нафар фарзанднинг отаси, ўнлаб невараларнинг бобоси. Фарзанд ва невараларга панд-насиҳат қиладиган, уларни тўғри йўлга бошлайдиган, ибратли амалларга бош-қош бўладиган пайти. Бироқ, у киши ёшига яраша иш қилмади. Ҳукумат қарори билан шахсий уй-жой қуриш учун ер жратиш тақиқлангунга қадар 50 гектар майдонга раислик қилаётган ўғлининг фермер хўжалигига қарашли бўлган ерларнинг суғориш қийин бўлган майдонидан фуқароларга уй-жой қуриш учун ер сотиш билан шуғулланган Т. Мелибоев яна ер сотишни қўмсаб қолди.
Бир қанча пайтдан буён оиласи билан ижарама-ижара яшаш жонига теккан Самариддин сўраб-суриштириб, Турғунбой бобога учрашди. Уй-жой қуриш учун ер майдони сотиб олишга маблағи борлиги, ижарада қийналиб кетганлигини эшитгач Турғунбой бобо унинг мақсадини тушунди. Шу кунларда ўзи ҳам пулга бироз қийналиб турганди.
-Ука, ўзингизга маълум, ҳозир вазият анча мураккаб. Ер сотиш мумкин эмас, бироқ сизнинг аҳволингизга ачинаяпман. Майли, сизга шахсий уй-жой қуришингиз учун фермер хўжалиги экин майдонининг бир четидан 0,25 сотих ер ажратиб бераман, - деди Турғунбой бобо. - Фақат эвазига харажати учун 35.000.000 (ўттиз беш миллион) сўм берасиз. Айтганча, уйни ҳозир қурмайсиз.
Дастлаб молхона қурасиз, сўнгра 2-3 йил ўтгач аста-секинлик билан уй-жой қурасиз. Мен уйни ҳужжатлаштиришга ёрдам бераман. Илгари бошқаларга ҳам шундай кўмаклашганман.
Турғунбой бобонинг гапларидан Самариддиннинг кўнгли тўлди. Бирга бориб ер майдонини кўришди. Самариддинга маъқул бўлди, савдолари пишди. Эртаси куни пулнинг бир қисмини олиб келадиган бўлди.
Орадан уч кун ўтиб, келишилган жойда айтилган пулнинг 10.000.000 (ўн миллион) сўмини Самариддиндан Турғунбой бобо санаб олаётган пайтда Департаментнинг туман бўлими ходимлари томонидан жиноят фош этилди.
“Ўрганган кўнгил ўртанса қўймас” деганларидек, Турғунбой бобога бу қилиши анча қимматга тушди. Эл-юрт, таниш-билишлари, ошна-оғайнилари, ҳамқишлоқлари орасида юзи шувит бўлди.
Т.Мелибоев Ўзбекистон Республикаси ЖКнинг тегишли моддалари билан айбли деб топилиб, жазога тортилди.
Ҳусниддин РАЗИҚОВ,
Ўзбекистон Республикаси Бош Прокуратураси
ҳузуридаги ИЖҚК Департаменти туман бўлими бошлиғи.
