8 март - Халқаро хотин-қизлар байрами арафасидда туманимиз мактабларида турли йилларда ёш авлодга таълим-тарбия берган нуроний онахон ўқитувчи-устозларга “ТАНҲО” ошхонасида тўкин дастурхон ёзилди.
Таълим фидойиси бўлган 50 нафар онахон – қадрдонлар байрам муносабати билан мириқиб дилдан суҳбатлашдилар. Туман халқ таълими мудири Замира Алиқулова байрам иштирокчиси бўлган онахон устоз- муаллималарни сўлим баҳорнинг дастлабки байрами - Халқаро хотин-қизлар куни - 8 март байрами билан қизғин табриклади.
Туман халқ таълими Фахрийлар уюшмаси (раиси Абдусаттор Каримқулов) ва Маърифатпарварлар жамияти (раис ўринбосари Баҳодир Қулбоев) ташаббуси билан ташкил этилган бу баҳорий тадбир давомида иштирокчилар шўх лапарлар ва мусиқа садолари остида мириқиб рақсга тушдилар.Тадбир давомида сўзга чиққан 55-мактаб директори Раъно Ҳакимова, нуроний ва фахрий ўқитувчилардан Муҳаббат Ҳамидова, Бувраҳима Йўлдошева, Бувойша Жўрақулова, Хадича Тоштемировалар тадбир иштирокчиларини хотин-қизлар байрами билан қизғин табрикладилар.
-Таълим соҳасининг биз кекса авлод вакилларига кўрсатилган бу баҳорий эъзоздан ниҳоятда хурсанд бўлдик, - дейди нуроний ўқитувчи онахонлардан бири Бувойша Жўрақулова. - Ташкилотчиларга тадбир иштирокчилари номидан катта миннатдорчилик билдирамиз.
Тадбир давомида ҳар бир иштирокчига туман халқ таълими бўлими ва ташкилотчиларнинг қимматбаҳо эсталик байрам совғалари тантанали равишда топширилди.
Раббим ҲОТАМОВ.
