Устоз Мен каби ўқитувчига бу ҳурматдан юксак бахт бўлмаса керак. Йигирманчи асрнинг 70, 80, 90-йиллари давомида кўплаб шогирдларимга билим берганим сабабли Устоз деган энг ёқимли сўз мендек оддий ўқитувчинингсамарали меҳнатига берилган энг катта баҳо, энг катта бойлик, деб биламан.
15 йил давомида оддий ўқитувчи сифатида қишлоғимиз ёшларига таълим-тарбия бердим. 22 йил мобайнида 9-мактаб директори сифатида ёш ўқитувчилар ва мактаб ўқувчиларига устозлик қилдим. Айни пайтда мен тарбиялаган ўқувчилариммустақил юртимизнинг фаровонлига учун турли соҳаларда самарали меҳнат қилишмоқда. Шогирдларим ҳар бир тадбир ва байрамларда эшигимдан қучоқ очиб киришади.
- Устоз... - дейди шогирдларим. - Сизнинг меҳрибонлик билан берган доно маслаҳатларингиз, тўғри йўл кўрсатиб айтган гапларингизни соғиндик.
Бу гаплардан энтикиб кетаман. Шундай беғубор шогирдлар тарбиялаганимдан хурсандман. Яқинларимдан эшитмаган ширин гапларни шогирдларимдан эшитиб бошим кўкка етади.
Сўлим баҳор нафаси уфуриб турган шу кунларда, Халқаро хотин-қизлар куни - 8 март арафасида Гулчирой, Гулбаҳор, Гулсанам, Гулсара, Абдуқодир, Акмал, Акрам, Абдулла каби қалби дарё шогирдларимнинг эшикдан кириб келишларидан бошим кўкка етди. Турли соҳаларда жавлон ураётган, 50-60 ёшни қаршилаб қолган бу шогирдларим билан ширин суҳбатлашдик. Менимча оддий ўқитувчи учун бундан ортиқ бахт бўлмаса керак. Ҳозир пенсиядаман. Шунга қарамай Оломон қишлоғидаги 9-умумтаълим мактаби тадбирларининг доимий иштирокчисига айланганман.
Атрофимда йигирмага яқин невара, чевара, эваралар парвона. Уларга ўтган замондаги ва ҳозирги кундаги эртакларни мароқ билан гапириб бераяпман. Менимча мана шуларнинг ўзи мен учун катта бахт.
Фурсатдан фойдаланиб туманимиздаги барча хотин-қиз ўқитувчи-устозларни сўлим баҳор байрами, Халқаро хотин қизлар куни - 8 март байрами билан қизғин муборакбод этаман.
Бибираҳима ЙЎЛДОШЕВА,
Ўзбекистон халқ таълими аълочиси.
