Яқинда туман ҳокимлигида туман прокурори С.Саидов бошчилигида сектор раҳбарлари ва туман ИИБ профилактика инспекторлари иштирокида йиғилиш бўлиб ўтди. Йиғилишда туман прокурори ўринбосари Суннат Каримов туман ИИБ профилактика инспекторларининг жиноят содир этишга мойил шахслар, профилактик ҳисобга олинганлар, маъмурий назоратга олинган шахслар рўйхати каби 11 та мезон бўйича юклатилган вазифаларнинг бажарилиши юзасидан маъруза қилди.
Маърузада Оқтош, Саҳоват, Олмазор, Соҳибкор МФЙлардаги профилактика инспекторлари ҳар пайшанба “Профилактика куни”, тунги навбатчилик, таянч пунктлари тўғри ташкил этилмаганлиги, белгилаб олинган 11 та мезон талаблари ҳаққоний ва холис шакллантирилмаганлиги таъкидлаб ўтилди.
Йиғилишда келгусида жойларда жиноятчилик ва ҳуқуқбузарликларнинг барвақт олдини олиш учун муқаддам судланганлар, ичкиликка ружу қўйганлар, жиноят содир этишга мойил бўлган шахслар билан алоҳида ишлаш, ҳуқуқий тарғибот тадбирларини янада кучайтириш каби вазифалар белгилаб олинди.
Равшан БАҲРИДДИНОВ,
туман прокурорининг катта ёрдамчиси.
