Ўтган йили эрта баҳорда, кечқурун, қош қорайганда Булунғур туманининг чекка ҳудудида, Зарафшон дарёсининг ўнг қирғоғидаги “Аширтўп” қишлоғининг овлоқ жойида, “Мирзаариқ” каналининг устига қурилган кўприк ёнида мудҳиш воқеа юз берди. Бундай қабоҳатли воқеанинг нафақат гувоҳи бўлган, уни эшитган кишининг ҳам вужуди титраб кетади. Бир қориндан талашиб тушган, бир идишдан таом еб, бир тўшакда ётиб катта бўлган, бир ҳовлида ота-онасининг бағрида ўсиб-улғайган ука ўз акасининг қотилига айланди. Ака укасининг қўлида жон таслим қилди. Ука акасини ўз қўллари билан бўғиб ўлдирди. Қўллари қонга беланди, “қотил” деган ном орттирди. Натижада катта бир оила пароканда бўлди. Марҳумнинг оиласи боқувчисидан айрилди. Икки мурғак фарзанд отасиз қолди, турмуш ўртоғи бегидан айрилди. Ота-она бир суюкли фарзандидан жудо бўлди. Бу тасодиф ҳам бахтсиз ҳодиса ҳам эмас, атайин, қасддан, олдиндан режалаштирилган ҳолда уюштирилган қотиллик эди.
Балоғат ёшидаги коллеж ўқувчисида оғасига нисбатан бунчалик қахр-ғазаб, адоват ва қабихлик, разолат қачон пайдо бўла қолди? Наҳотки оғи инисига кечириб бўлмайдиган даражада зуғум ўтказиб келган бўлса? Ё бойлиқ, мулкка эгалик ҳисси устун келиб, қўли қонга булғандимикан? Ёки, ота-она, маҳалла-кўй, қариндошлар, таълим даргоҳлари тарбияда адашдимикан? Қаерда хатоликка йўл қўйилди? Саволлар кўп, жавоб эса...
Ҳаммаси Исломнинг Россия давлатига бориб ишлаши давридан бошланди. Соҳибжон турмуш ўртоғи Меҳринисо билан Россия давлатининг Самара шаҳрига ишлаш учун кетган. Хорижда, мусофирчиликда, гарчи шароитлар айтарлик даражада бўлмаса ҳам, оила иқтисодини тиклаш мақсадида қийинчиликларга чидаб ишлашига тўғри келди. Кейинчалик қўшимча иш топилганлигидан фойдаланиб ҳарна оилага наф деб, укаси Исломни ҳам мобиль телефон орқали сим қоқиб, ишга чақирди. Иккаласи иссиқхонада ишлай бошлашди. Беш-олти ой ишлагач иш оғирлиги, устига-устак соғлиги бироз ёмонлашганлиги боис Ислом акасига уйга қайтиш истаги борлигини таъкидлади. Акаси яна бироз ишлаб, сўнгра биргаликда уйга қайтишни айтиб, яна бир ой мажбуран ишлашди. Акасининг уйга кетишга рухсат бермасдан, бел соҳасида оғриқ пайдо бўлсада ишлашга мажбур қилган пайтдан бошлаб Исломда акасига нисбатан нафрат уйғона бошлади. Ўша пайтдан бошлаб қай йўсинда бўлса ҳам акасидан ўч олиш, бир йўла тинчитиб қўя қолиш фикри тинчлик бермай қўйди. Ака-ука биргаликда уйга қайтишгач, Ислом коллеждаги ўқишини ташлаб кетганлиги боис янги ўқув йилидан бошлаб ўзидан бир ёш кичик бўлган ўқувчилар билан ўқишни бошлагани, ўқитувчиларнинг ундан дарсларга тўлиқ қатнашишини талаб қилаверишлари, унинг эса ўзидан кичик ёшдаги ўқувчилар билан бирга ўқишни истамаслигидан жаҳли чиқиб, бу ҳолга тушишида акасини сабабчи деб ҳисоблаб, нафрати янада кучая борди.
Уйга келгач Россияда ишлаб топган пулларига деҳқончиликдан орттирган пулларни қўшиб, рўзғорнинг кам-кўстини тўлдиришга ҳиссаси бўлсин деб эскироқ, таъмирталаб бўлса-да, “Дамас” автомашинаси сотиб олишди. Машинани оила бошлиғи Болибек аканинг номига расмийлаштиришди. Аввалига автомобиль бошқаришга ҳуқуқи бўлмасада, уч ойча автомашинани Ислом у ёқ-бу ёққа миниб юрди. Сўнгра машинани ҳам, ўқишни ҳам ташлаб, Тошкент шаҳрига ишлаш учун жўнаб қолди. Кеч куздан эрта баҳоргача Тошкент шаҳрида турли хил юмушларни бажариб юрган Ислом ора-чора уйга бир икки кунга келиб кетар, шу орада акаси автомобилни бошқариш ҳуқуқига эга бўлганлиги, автомобиль сотиб олиш пайтида ҳам ўзи билан маслаҳат қилмаганлиги унинг акасига нисбатан бўлган нафратини янада кучайтириб юборди. Тошкент шаҳридан ишдан келгач махсус ҳайдовчилик курсини тугаллаб, ҳайдовчилик гувоҳномасига ҳам эга бўлди. Шунда ҳам акаси ҳар куни эрталабдан кечгача ишлаш учун Самарқанд шаҳрига қатнаганлиги, вақт ва сабаб бўлмаганлиги боис укасига машина тегмай қолганди. Ислом автомашина бошқариш ҳуқуқи бўлса ҳам машина ўзига тегмаётгани алам қилар, яна янгидан янги қабиҳ режалар тузар, тезроқ режани амалга оширса-ю, машинага ўзи эгалик қилса. Қишлоқдошлари, тенгдошлари кўз ўнгида мазза қилиб миниб юрса. Тошкентга ҳам йўловчи машинада қатнаб юрмасди. Шу каби ҳаёллар гирдобида бўлган Ислом бугунни эртага қўймай акасини тинчитиб қўя қолиш пайига тушди. Ўзидан уч ёш кичик бўлган қариндоши, вояга етмаган Одилжон билан ҳар замонда суҳбатлашиб турарди. Ўйлаб юрган қабиҳ режасини амалга ошириш учун акаси ўзидан ўн ёш катта бўлганлиги боис жисмонан кучи етмаслигини билиб, ўзига жиноий шерик излай бошлаган Ислом Одилжоннинг қўйнига қўл солиб кўрди. Бир куни гап орасидақабиҳ режаси ҳақида гапирганида Одилжон “акасидан жаҳли чиққанда, шунинг учун гапираётгандир”, деб унчалик эътибор бермади, кулимсираб қўяқолди. Орадан кўп ўтмай яна учрашганларида гап яна шу ҳақда кетди. Бу гал Ислом қатъийроқ гапириб, ўзига шерик кераклиги ва бу ишга аралашса, кейинчалик барча жавобгарликни ўз бўйнига олишини таъкидлади. Ҳали вояга етмаган Одилжон бундай қабиҳ режа ҳақида эшитгач, сесканиб, баданидан совуқ тер чиқди, розилик бермади. Орадан бир-икки кун ўтиб, улар яна учрашишди. Қишлоқдаги дўкондан сигарета олиб, иккаласи кўча айланишди. Гап орасида Ислом акасини ўлдирмоқчи эканлигини, бир ўзининг кучи етмаслигини таъкидлаб, ундан фақатгина режа амалга оширилаётган вақтда автомашинанинг калитини бураб ўчириш ҳамда акаси қаршилик кўрсатаётган вақтда оёқ-қўлини ушлаб туриш кифоя эканлигини уқтирди. Агар ўйлаган қабиҳ режалари амалга ошса иккаласи “Дамас” автомашинасига эга бўлиб, машинада Тошкентга кетиши, бирга ишлаб мўмай даромадга эга бўлишлари мумкинлиги ҳақида таъкидлаб, 2-3 маротаба ёрдам бериш-бермаслигини сўрайвергач, ҳали ака-ука, оға-ини, қавму-қариндош, ёру-биродар деган тушунчаларга тўлиқ ақли етмаган, содир этилиши олидиндан режалаштирилаётган мудҳиш ҳодисаларнинг оқибати қандай тугаши ҳақида ҳаётий тушунчага эга бўлмаган ўспирин Одилжон олди-кетини ўйламасдан розилик берди. Бу пайтда улар “Мирзаариқ” канали устидаги кўприкга етганди. Шундан сўнг улар кечқурун шу ерда кўприк устида учрашадиган бўлиб тарқалишди.
Ўзига муносиб шерик топганидан кўнгли хотиржам тортган Ислом уйга келгач кечки тайёргарликни бошлаб юборди. Худди жангари киноларда жиноий гуруҳлар “операция”ларга олдиндан пухта тайёргарлик кўргани каби қоронғуда кўзга ташланмаслик учун оёғига қора рангли кроссовка, қора рангли жинси шим ва эгнига жигарранг жемперни кийди. Оғилхонага бориб, прессланган сомондан қолган 3 дона полиэтилендан тайёрланган ипларни шимининг иккала чўптагига солиб, кўприк томон кетди. Кечқурунги режалаштирган ишларини бир неча бор хаёлидан ўтказиб, режа пухта ўйланганлиги, “мис”и чиқмаслигига ишонч ҳосил қилди. Устига-устак шерик ҳам унча тихирлик қилмади. Кўприк устига келиб, бармоқлари орасидаги “Палл-мал” сегаретини чуқур-чуқур тортиб, қишлоқ томон қаради, шериги кўринмади. Қуёш ботай деб қолган, демак ҳали вақт бор. Шунча ой, шунча кун кутган яна бироз кутишга сабри чидайди. Унгача эса акаси Соҳибжон қайси пайтда, қай томондан келиши, ва уни қандай кутиб олиши, сўнгра ўтказилиши режалаштирилган ишлар ҳақида бош қотириб турса ҳам бўлади.
Соҳибжон турмуш ўртоғи, укаси билан биргаликда Россияда ишлаб топган маблағи етмаганлиги боис отаси билан маслаҳатлашиб, ҳарна рўзғорга яраб турар деган мақсадда деҳқончиликда орттирилган даромадни ҳам қўшиб, таъмирталаб бўлс-ада, “Дамас” автомашинаси сотиб олишди. Машинани таъмирлашда ҳам, ҳужжатларини расмийлаштиришда ҳам мунтазам отаси билан маслаҳатлашди. Укаси эса ҳали балоғат ёшида эканлиги, қолаверса Исломжондан ҳам кичик бўлган укалари, сингилларига ҳам рўзғор юки тушмаслигини ўйлаб уларга бу ҳақда айтмай қўяқолишди. Машина таъмирдан чиққанидан сўнг Соҳибжон қишлоғидаги уч-тўртта йигитлар билан Самарқанд шаҳрига бориб мардикорчилик қилар, ўзи ҳам улар билан бирга ишлаб, кечқурун яна уйга қайтишарди. Ўзининг ишлаб топган пулига бирга ишлаган ҳамқишлоқларининг йўлкира учун берилган пулини ҳам қўшиб отасига топширарди. Ислом эса ҳамқишлоқлари қачон, қаерда тушиб қолишини яхши билар ва бу ҳам қабиҳ режасидан ўрин олган эди.
Одилжон ҳам кўп куттирмади. Кун ботишига бироз фурсат борлиги туфайли иккаласи яна бир бор “режа” ҳақида фикрлашиб олишди. Кун ботиб, ғира-шира бўла бошлаган пайтда кўча бошида машина кўринди. Ислом акасига тегишли бўлган “Дамас” автомашинасини узоқдан таниди. Сабаби машинанинг чап томон тунни ёритувчи фараси хира ёнарди. Машина акасининг бошқарувидаги “Дамас” эканлигини билган Ислом режага кўра Одилжон билан секин кўприкдан қишлоқ томон юра бошлашди. Орадан тўрт-беш дақиқа ўтгач, машина яқинлашди. Ислом қўл кўтаргач машина тўхтаб, акаси ундан уйга кетаётганлигини сўради. Аввалдан келишувга кўра Одилжон машинанинг олд йўловчи ўриндиғига, у эса ўрта ўриндиқнинг ҳайдовчи томонидаги ўриндиғига ўрнашиб олди. Машина секин жойидан қўзғалиб, қишлоқ томон юра бошлади. Бироз юргач ўнг томонга қайрилишди. Ғараз ниятлардан бехабар Соҳибжон укаси билан гаплашиб борар экан, бу пайтда укаси шум ниятини амалга оширишни бошлаб юборганди. Машина пастликка тушаверишда укаси чўнтагидан пресс иплардан бирини олиб, акасининг бўйнига солди...
Дастлаб Соҳибжон нима бўлаётганини тушунолмай қолди. Машина кетиб борар, у эса иккала қўлини ҳам рулдан олиб, бўйнидаги ипга ёпишди. Ислом орқа томондан ипни маҳкам тортиб турганлиги, қолаверса машина ўриндиғининг бош қўйгичи борлиги сабабли бўйни билан ипнинг орасига қўлини сололмай жон ҳолатда ипга ёпишди. Ипни маҳкам торитб турган Ислом Одилжонга машинанинг калитини бураб ўчиришни буюрди. Илгари бундай аянчли манзарага ҳеч дуч келмаган ўспирин бир муддат нима қилишини билмай, довдираб қолди. Исломнинг қайта айтган гапидан сўнг у калитни орқага бураб, машинани ўчирди. Машина узатмада бўлганлиги учун ўчиб, тўхтаб қолди. Соҳибжоннинг типирчилаётганлиги, оёқ-қўлини ҳар томонга жон ҳолатда ташлаётганлигини кўриб, Одилжонга қўлларини ушлаб туришни буюрди. Одилжон Соҳибжоннинг қўлларини ушлаб пастга қараб торта бошлади. Жони ҳиқилдоғига келган Соҳибжон типирчилаб оёқларини юқорига кўтариб, машинанинг олд ойнасини тепа бошлади. Ойна дарз кетди, орқани кўрсатувчи ойна синди, секин қўллардан ҳам мадор кетиб пастлади, оёқлар ҳам тепинишлардан тўхтади. Шундан сўнг ҳам бир муддат бўйнидаги иплар бўшатилмади. Бироздан сўнг хириллаш ҳам тўхтаб, жим бўлиб қолди. Шундан сўнг иплар бўшатилди. Одилжонга тезда орқа ўриндиққа ўтишни буюриб, ўзи эса орқа ўриндиқдан туриб акасининг жасадининг гавда қисмини йўловчи ўриндиқ томонга ўтказиб, ҳайдовчи ўриндиғи томонидан эса оёқларини ўтказиб, ўзи машина рулига ўтириб, машинани “Янгиқара” қишлоғи томонга ҳайдаб кетди.
Жиноятчилар режага кўра жиноятнинг иккинчи қисмини бошлашлари лозим эди. Машина “Мирзаариқ” каналининг бўйига етганида Одилжон машинадан тушиб қолишини айтганда, Ислом унинг гапига ҳам парво қилмай, машинани ҳайдаб кетаверди. Тақдирни қарангки, Соҳибжон ҳали ўлмаган эди. У ҳушига кела бошлади. Унинг қимирлаётганини кўрган Исломнинг бошидан ҳуши учди. Қўрқиб кетди. Дарҳол машинани тўхтатиб, акаксининг бўйнида қолган ва уни бўғишда фойдаланган ипидан ушлаб, яна бўға бошлади, акаси у томонга интилди. Ислом машинадан тушди. Акаси ҳам машинадан туша бошлади, кучи, қуввати, мадори бўлмаган Соҳибжон машинадан тушар чоғи ерга юзтубан ағанади. Ислом зудлик билан келиб, акасини ип билан яна бўға бошлади. Бир дақиқа давомда ипни маҳкам ушлаб турди. Соҳибжонда куч қолмади, ҳаёт билан видолашиш фурсати етди чоғи, бирданига ўзини бўш қўйиб юборди, мушаклари бўшашди. Энди акасининг жони чиққанлигига амин бўлган Ислом чўнтагидан яна бир дона ип олиб, акасининг қўлини орқага қилиб боғлаб, Одилжон билан бирга акасининг жасадини кўтариб, ён томон эшикдан орқа ўриндиққа жасадни юклашди. Сўнгра машинани “Қирқшоди” МФЙнинг марказига қараб бошқариб бориб, у ердаги қурилиш ашёлари билан савдо қилувчи дўкондан узунлиги 3 метр, ранги оқ бўлган, акасини бўғишда ишлатилган шунақа ингичкаликда бўлган ипларнинг ўрама шаклида думалоқлаб тайёрланган қалин арқонни 6 минг сўмга сотиб олиб, “Қарабчи” қишлоғи бўйлаб “Аширтўп” қишлоғи томон кетишди. Тун. Атрофга қоронғулик чўккан. Машина “Қарабчи” қишлоғи бўйлаб кетмоқда. Қишлоқдан чиқаверишда, овлоқроқ жойда машинани тўхтатиб, ўзи сотиб олган арқонни сиртмоқ кўринишида боғлаб, акасининг бўйнига тақиб қўйди. Акасининг оёғида қолган бир пой туфлисини ва бўйнидаги бир дона пресс ипни олиб, четга улоқтириб юборди. Машина бошқарувига ўтиргач акасининг оёғидаги бир жуфт пайпоғини ҳам ечиб, ойнадан ташқарига улоқтириб юборди. Тун қоронғусида “Аширтўп” қишлоғига етиб келишгач, машинани шу яқин атрофдаги бир фермернинг дала майдонига қараб ҳайдади. Ариқ ёнидаги машина-трактор юрадиган чанг йўлдан бироз юришгач машинани тўхтатишди. Атроф жимжит, сокинлик, ўткинчилар ҳам йўқ. Ислом машинадан тушиб, акаси ўтирган эшикни очиб, акасини белидан қучоқлаб, машинадан тушира бошлади. Мурданинг бир оёқлари тушмай қолди. Одилжон тезда келиб, оёқларни ушлаб тушириб олди. Икковлашиб тол дарахти остигача олиб боришди. Ислом жасадни Одилжонга кўтартириб қўйиб, ўзи арқоннинг иккинчи учини олиб, дарахтга чиқиб боғлади. Шу билан акаси худди ўзини ўзи осиб қўйгандек ҳолатга келтиришди. “Дамас” автомашинасини шу жойда қолдиришди. Тун алламаҳал. Икковлари уй-уйларига тарқалишди. Ислом уйга кириб ухлаб қолди. Ота-онаси эса вақт алламаҳал бўлиб қолганлиги, Соҳибжон сабабсиз ҳеч бунчалик кеч қолмаганлиги учун хавотирда. Туни билан мижжа қоқмай чиқишди. Тонг отгач онаси кириб, Исломни уйғотди. Акаси туни билан келмаганлигини, унинг хабари бор-йўқлигини сўради. Шу пайт жасад осиғлик турган ер майдонининг эгаси “Дамас” русумли машинада келиб уни, янгасини, онасини ва отасини бир жойга олиб боришини айтиб, машинага ўтқазиб олиб кетди. Бу пайтда қаёққа кетишаётганликларини фақатгина Ислом билар, бошқалар эса бехабар эди. Фурсат ўтмай машина ариқ ёнига келди. Қарадики, ўзларининг “ Дамас” русумли автомашиналари шу ерда, сал нарида эса тол тагида мурда осиғлик турибди. Диёнатни йўқотган Ислом ҳеч нарсадан бехабардек югуриб бориб акасининг жасадини кўтариб олди. Бошқалар эса машина билан ўралашиб қолишганди. Бироз фурсат ўтгач бошқа қариндошлари ҳам етиб келишди. Отаси дарахтга чиқиб, арқонни ечиб олишди. Мурдани ўзларининг “ Дамас” машинасига ортиб, уйга келишди. Шунда ҳам Ислом ҳеч нарсадан бехабардек акасининг жасадини қучоқлаб, бир муддат ёнида ётди. Бироз ўтгач уни янгаси турғазган вақтда одамлар йиғила бошлаганди. Совуқ хабар тез тарқалади. Қўшнилардан кимдир қўнғироқ қилган, тезда ИИБ ходимлари ҳам келиб қолишди. Улар бошқалар қатори Исломдан ҳам тушунтириш хати олишди. У тушунтириш хатида жиноятини яшириш мақсадида ёлғон кўрсатма берди. Шундай бўлсада уни ИИБга олиб кетишди. Шу кунниг ўзида бошқа гумонланувчилар қатори Одилжон ҳам сўроқ қилинди. У дастлабки суриштирувдаёқ Ислом билан бирга жиноят содир этишганлигини тан олди.
Судга оид тиббий экспертизанинг хулосасига кўра марҳум С.Каримовнинг ўлими сиртмоқ билан бўғишда бўйин аъзоларининг қисилиши натижасида механик асфикциядан келиб чиққанли исботланди. Буни бўйиннинг ўрта учлигида олдиндан орқага кўндаланг йўналган, уч изли, учлари туташган ўзига хос эгат мавжудлиги, эгат йўналиши бўйича тери остига қон қуйилишлари, умумий асфикция белгилари, тез ва қисқа вақт ичида юзага келган ўлим белгилари мурда доғларининг кенг тарқалган ва қўшилувчан тўқ бинафша рангда бўлиши, кўз шиллиқ пардалари остига қон қуйилиши, ички аъзоларининг, ўпка плевра варақлари ва юракнинг ташқи варағи остига қон қуйилиши, ички аъзоларининг тўлақонлиги, қоннинг тўқ қизил рангда бўлиши, талоқнинг камқонлиги, уйқу артерияси интимасининг ёрилишлари, бўйин соҳа юмшоқ тўқималарига қон қуйилиши ва суд-гистологик текшируви натижалари тасдиқлаши, дастлабки мурда ўзгаришларининг (мурда совуши, мурда қотиши, мурда доғлари ва ҳакозо) ривожланиш даражасига кўра айтиш мумкинки, унинг ўлими содир бўлган пайтдан то суд-тиббий текширувга қадар бир кундан кам бўлмаган муддатда вақт ўтган бўлиши мумкинлиги кўрсатилган эди.
С.Каримовнинг мурдаси танасида, яъни бўйиннинг ўрта учлигида олдиндан орқага кўндаланг йўналган, уч изли, учлари туташган ҳаётий сиртмоқ изи (стренгулясион эгат) кўринишидаги жароҳати мавжуд бўлиб, у ўтмас қаттиқ жисм (сиртмоқ) таъсирида етказилганлиги, ушбу асфикция билан кечган жароҳатида оғир тан жароҳатлари белгилари мавжуд бўлиб, унинг ўлими сабаби билан бевосита боғлиқлиги, шунингдек пастки жағ, бўйин, ўнг қўл учинчи бармоқ, иккала курак усти, бел, ўнг тизза бўғими, чап болдир соҳаларида шилинмалар, чап лунж, пастки жағ, иккала болдир соҳаларида қонталашлар каби тан жароҳатлари мавжуд бўлиб, ушбу жароҳатлар ўлимидан олдин қисқа вақт оралиғида ўтмас қаттиқ жисмлар таъсирида етказилганлиги, енгил тан жароҳатлари гуруҳига киришлиги, шунингдек, бўйиннинг юқори учлигида чапдан ўнгга йўналган пастдан юқорига кўндаланг қийшиқ кўтарилган учлари сиртмоқ изи, чап ёнбош соҳасида шилинма каби жароҳатлар мавжуд бўлиб, ушбу жароҳатлар унинг ўлимидан кейин ўтмас қаттиқ жисмлар таъсирида етказилганлиги аниқланган.
Суд мажлисида сўроқ қилинган судланувчи И.Каримов айбига тўлиқ иқрорлик билдириб, дастлабки терговда берган кўрсатмаларини тасдиқлаб, акаси С.Каримовни жияни О.Мустапоев ёрдамида ип билан бўғиб ўлдирганлигини, у содир этган жиноятига иқрорлик билдириб, чин дилдан пушаймонлигини инобатга олиб, унга нисбатан қонуний енгиллик беришни сўраб кўрсатув берди.
Суд мажлисида сўроқ қилинган жабрланувчи Алимова Меҳринисо ўзининг кўрсатмасида, марҳум С.Каримов унинг турмуш ўртоғи бўлишлиги, қайнотаси, қайнонаси, қайнукалари, қизи билан биргаликда бир ҳовлида бир рўзғор бўлиб яшаганлиги, қайукаси И.Каримов томонидан содир этилган қотиллик жинояти оқибатида С.Каримов вафот этганлиги, оиласининг ҳеч бир аъзоси ҳеч қаерда ишламасада, томорқасида деҳқончилик қилиш, мардикорчилик қилиш билан рўзғор тебратиб келишлигини, қайнукаси сўнгги пайтларда О. Мустапоев билан кўпроқ учрашадиган бўлишганлигини, уларнинг ўзаро маслаҳатлашган ҳолда у мактабни битиргач, Тошкент шаҳрига ишлаш учун кетишини режалаштирганликларидан хабари борлигини, қайин ука ва унинг вояга етмаган жиноий шериги О.Мустапоевга нисбатан қонуний чора кўришликни сўради.
Суд ҳайъати, баён қилинган Қонун ва Пленум Қарорлари тушунтиришларига асосланган ҳолда, судда аниқланган иш ҳолатларидан келиб чиқиб, судланувчи И.Каримов ва вояга етмаган судланувчи О.Мустапоевлар акаси С.Каримовни қасддан ўлдириш мақсадида ҳаракат қилишган, улар ўзларининг ушбу қилмишларининг ижтимоий хавфли хусусиятини англаган, унинг ижтимоий хавфли оқибатларига кўзи етган ва уларнинг юз беришини исташган, деб ҳисоблади.
Судланувчи И.Каримовга Ўзбекистон Республикаси ЖКнинг 97-моддаси 2-қисми и, п бандлари ва 127-моддаси 3-қисмида назарда тутилган жиноятларни содир этганликда айбли деб топилиб, ЖКнинг 59-моддасига асосан тайинланган жазоларни қисман қўшиш йўли билан ўташлик учун узил-кесил 18 (ўн саккиз) йил муддатга озодликдан маҳрум қилиш жазоси тайинланди. Жазони умумий тартибли колонияда ўташлик белгиланди.
Судланувчи, вояга етмаган О.Мустапоевга Ўзбекистон Республикаси ЖКнинг 97-моддаси 2-қисми и, п бандларида назарда тутилган жиноятни содир этганликда айбланиб, ЖКнинг 85-моддасига асосан 10 (ўн) йил муддатга озодликдан маҳрум қилиш жазоси тайинланди. Жазони тарбия колонияларида ўташлик белгиланди.
Жиноятчилар қилмишларига яраша қонуний жазоларини олишди. Бироқ, уларнинг ота-оналарининг энди қалби кемтик. Айниқса, суюкли фарзанди, суянчиғи, ишонган тоғидан айрилган онаизорнинг аҳволини сўз билан таърифлаб бўлмайди. Марҳумнинг турмуш ўртоғи фарзандлари улғайгач, онасидан отасини сўрашса, қандай жавоб қайтаради?... Ҳаёт эса давом этаверади.
Т. ҚОДИРОВ,
Жиноят ишлари бўйича Самарқанд
вилоят судининг судьяси.
Т. ШЕРБОЕВ,
“Булунғур ҳаёти”нинг мухбири.
