G'ayrati ichiga sig'may borayotgan Tangriberdi Norboyev 35 yil davomida temir yo'lda oddiy ishchi, brigada boshlig'i, hudud ustasi bo'lib ishladi. Nafaqaga chiqqach uyda o'tiraolmadi. O'zi yashayotgan "Kattaqishloq" mahallasida jamoatchilik asosida mahalla nuroniylari raisi sifatida ishga sho'ng'ib ketdi.
- Mahallamizda 19 nafar 70 yoshdan 95 yoshgacha bo'lgan nuroniylarimiz istiqomat qilishadi, - deydi Tangriberdi aka. - Ularning har birining o'ziga xos quvonch va tashvishlari bor. Ularning boshini biriktirib, dardini eshitish mening vazifam.Eng asosiysi, "men pensionerman, boboyman", deb tushkunlikka tushmay yurgan nuroniylar mahalla faollarining eng yaqin maslahatchisi, yo'lboshchisi hisoblanadi. Tinib-tinchimas nuroniylar mahalla hududida bo'lib o'tadigan to'y-tomoshalar, ma'rakalar, tadbirlar, hashar yo'li bilan bo'layotgan obodonchilik ishlarida bosh maslahatchi, yo'l-yo'riq ko'rsatuvchi.
Nuroniylar maslahati bilan katta zovurdan qishloq aholisi tomorqalarini sug'orish uchun hashar yo'li bilan katta ariq qazib kelindi. Hasharda mahalla yoshlariga nuroniylar boshchilik qilishdi, kerakli maslahatlarini berib turishdi. Shuningdek, nuroniylar bayramlarda, tadbirlarda o'zlarining tashabbusi bilan kam ta'minlangan oila a'zolari holidan xabar olib, ularga sovg'a-salomlar ulashadilar. To'shakda yotib qolgan bemorlar holidan doimiy xabar olib turishadi. Albatta, bularning hammasi o'z-o'zidan bo'lmaydi. Bularga albatta sermulohazali, oq-qorani yaxshi tanigan bir kishi boshchilik qilishi kerak-da. G'ayratli, tashabbuskor Tangriberdi Norboyev ana shunday mahalla nuroniylarinining boshini biriktiruvchi, jamoatchilik asosidagi mahalla nuroniylarining raisidir.
- Jamoatchilik asosidagi "Kattaqishloq" MFY nuroniylari kengashida 12 nafar maslahatchilar bor. - Go'bay Shodiyev, Turdimurod Otaboyev, Ochil Qo'shmurodov, Noroy Norqulova, Kumushoy Ibragimova kabi maslahatchilarimiz bilan Ingichka, Tegirmon, Oq ariq, Kazarma, Qiyon, Pastki va Yuqorigi markaz qishloqlarida to'y-ma'raka va tadbirlarida birga bo'lib, aholi o'rtasida bepoyon, jannatmonand yurtimizda, mahallamizda, qishloqlarimizda bo'layotgan olamshumul obodonchilik ishlari haqida miriqib suhbatlashamiz, - deydi mahalla nuroniylar jamoatchilik kengashi raisi Tangriberdi Norboyev. - Shuningdek, mahalla yoshlari bilan tez-tez uchrashib turamiz. Ularnig ishi bilan qiziqamiz. Kerak bo'lsa tegishli maslahatlarimizni beramiz. Bizning tinib-tinchimas nuroniylarimizning ishlari ana shulardan iborat. Nuroniylarimizni rag'batlantirish uchun oyida bir marta Samarqand shahriga, Buxoroga, Shahrisabzga sayohatlar uyushtirayapmiz. Kelgusi rejamizda Toshkent va Xorazm ziyoratgohlarini ko'zlab turibmiz...Rabbim HOTAMOV.
