Tumanimiz g'allazorlarida joriy yilgi o'rim-yig'im mavsumi boshlandi. Shu kunlarda keng g'allazor maydonlari ichra kombaynlarning gurullagan ovozi yangramoqda. Joriy yilda tumandagi 15 ta agrofirmaga qarashli mavjud 784 ta fermer xo'jaliklari dehqonlari 6 290 gektar maydonda qalb qo'ri bilan salmoqli g'alla hosilini yetishtirdilar. Saxiy yoz quyoshi nurlarida oltinday tovlanib turgan bo'liq boshoqlar mo'l hosildan darak berib turibdi.
Mirishkor dehqonlarimiz bu yil davlat qabul punktlariga 15 801 tonna g'alla yetkazib berishga bel bog'laganlar. Ayni paytda birinchilardan bo'lib g'alla o'rimini boshlab bergan "Zarbdor" agrofirmasiga qarashli "Jamolbek Zarbdor Sardori" fermer xo'jaligi g'allazorlarida ish qizg'in boshlanib ketdi. Mutaxassislar oltin boshoqdagi donlarga qarab "bu mo'l hosildan darak" deyishmoqda.
- Xo'jaligimizning 10 gektar maydonida yetishtirilgan g'allani sifatli o'rib olish uchun hamma sharoitlar yaratildi, - deydi "Jamolbek Zarbdor Sardori" fermer xo'jaligi raisi Xo'roz Jo'rayev. - Dalaning o'zida ishchilar uchun issiq ovqat tashkil qilindi. Dam olishlari uchun qulay sharoitlar yaratildi.G'alla o'rimida hozir bo'lganlarga Samarqand viloyat ekologiya, atrof-muhitni muhofaza qilish va iqlim o'zgarishi boshqarmasi Bulung'ur tuman inspeksiyasining xodimi Abdualim Shukurov tomonidan g'alladan bo'shagan maydonga o't qo'ymaslik to'g'risida tushuntirish targ'ibot ishlarini olib bordi.
Rabbim ERGASHEV.
