КОРРУПЦИЯГА ЙЎЛ ЙЎҚ
Жамиятимизда жиноятчиликнинг олдини олиш, коррупцияга қарши курашиш, бу борада тарғибот ишларини такомиллаштириш, фуқароларнинг ҳуқуқий онги ва билимини ошириш, дунёқараши ва мустаҳкам фуқаролик нуқтаи-назарини шакллантириш борасида кенг кўламли ишлар амалга оширилаяпти. Яқинда фуқаролар йиғинлари ўртасида ўтказилган “Энг фаол фуқаролар йиғини” кўрик-танловининг туман босқичи ҳам шу мақсадни кўзлаган эди.
Танлов иштирокчилари коррупцияга қарши курашиш бўйича ўз маҳалласида амалга оширилаётган ишлар билан таништириб, коррупцияга қарши курашга оид қонун ҳужжатларидан хабардорлик бўйича билимларини, шунингдек ўзлари тайёрлашган мавзуга оид видеороликлар ва тарғибот материалларини намойиш этишди. Танлов иштирокчилари кундалик турмуш жараёнида учраб турган муаммо ва камчиликлар ечимини топиш бўйича таклифларини ҳам ўртага ташлашди.
Танлов якунига кўра “Бешқўтон” МФЙ раиси Гулсум Асқарова 85 балл билан биринчи, “Гулзор” МФЙ раиси Абдусалов Элназаров 80 балл билан иккинчи, “Сайилтепа” МФЙ раиси Усмон Саттаров 79 балл билан учинчи ўринларни қўлга киритишди.
Кўрик-танлов ғолиблари ва иштирокчилари Фуқароларнинг ўзини ўзи бошқариш органлари фаолиятини мувофиқлаштириш бўйича туман Кенгаши томонидан дипломлар, фахрий ёрлиқлар ва эсдалик совғалари билан тақдирланишди.
Ўз мухбиримиз.
