Bugungi kunda jamiyatimizda o'qituvchining nufuzini oshirish, pedagog shaxsiga nisbatan hurmat va ehtiromni shakllantirish borasida olib borilayotgan keng ko'lamli ishlar aniq ko'zga tashlanmoqda. Oliy Majlis Qonunchilik palatasi tomonidan o'qituvchilarning ijtimoiy mavqeyini oshirish bo'yicha qonun loyihasi tayyorlanayotgani va bu jarayonda o'qituvchilarning fikr-mulohaza, takliflari so'ralib, inobatga olinganining o'zi yurtimizda pedagoglarning qadri yuksalayotganidan dalolat beradi.
Prezidentimiz Shavkat Mirziyoyevning 2022-yildagi Oliy Majlisga va xalqimizga yo'llagan Murojaatnomasida maktab ta'limini tubdan yaxshilash va uning sifatini oshirish, ustoz-muallimlarga munosib shart-sharoitlar yaratish borasidagi fikrlari asosiy o'rin egallagani, bu biz o'qituvchilarga faxr va g'urur tuyg'usini bag'ishlaydi. Yurtboshimiz ta'kidladilashicha: - dunyo tajribasi shuni ko'rsatadiki, yosh avlodni har tomonlama barkamol etib voyaga yetkazish uchun sarflangan sarmoya jamiyatga o'n, yuz barobar ko'p foyda keltiradi. Buyuk bobokalonimiz Abu Ali ibn Sino bundan 1000 yil oldin "Dovyurak va botir insonlar kelajakda sodir bo'ladigan qiyinchiliklardan qo'rqmaydi", deb bejiz aytmagan…Umumta'lim maktablaridagi ta'lim sifati poytaxtda ham, olis qishloqlarda ham yuqori bo'lishi uchun barcha sharoitlar yaratilmoqda. Olis hududlarda ta'lim sifatini yaxshilash maqsadida alohida dastur ishlab chiqilmoqda.
Misol uchun: boshqa tumandagi olis maktablarga borib dars beradigan o'qituvchi oyligiga 50 foiz, boshqa viloyatga borib ishlasa 100 foiz ustama haq to'lanadi. Shuningdek, tuman markazlarida xususiy maktablar faoliyatini rag'batlantirish uchun budjetdan subsidiyalar ajratilgan. E'tibor berib qarasangiz, jamiyatimizda o'qituvchilik kasbi eng nufuzli kasblar qatoriga chiqmoqda. Shunday ekan, biz o'qituvchilar o'quvchilarga sifatli ta'lim berish va o'z ustimizda ishlashdan aslo to'xtamasligimiz kerak. Zero, "bir soat sifatsiz o'tilgan dars kelajakka qilingan xiyonatdir". Ma'lumki, O'zbekiston Respublikasi Oliy Majlisi Qonunchilik palatasining "O'zbekiston Respublikasi Konstitutsiyasi to'g'risida"gi yangi tahrirdagi Konstitutsiyasi ishlab chiqildi va referendumga qo'yildi. Ushbu yangi tahrirdagi qomusimizda insonning qadr-qimmati, sha'ni va g'ururi ustun qo'yilib, eng avvalo, "Inson qadri uchun" g'oyasi ustuvor qilib olingan.
Yangi Qonun loyihasining 52-moddasida "O'zbekiston Respublikasida o'qituvchining mehnati jamiyat va davlatni rivojlantirish, sog'lom, barkamol avlodni shakllantirish hamda tarbiyalash, xalqning ma'naviy va madaniy salohiyatini saqlash hamda boyitishning asosi sifatida e'tirof etildi.
Davlat o'qituvchilarning sha'ni va qadr qimmatini himoya qilish, ularning ijtimoiy va moddiy farovonligi, kasbiy jihatdan o'sishi to'g'risida g'amxo'rlik qiladi", deyilgan.
Muhtaram Prezidentimiz tomonidan o'qituvchilarga qaratilayotgan e'tibor, yaratilayotgan barcha shart-sharoitlar barcha ustoz-murabbiylar uchun dasturilamal bo'lib xizmat qilayotgani har bir o'qituvchining o'z kasbidan faxrlanib yashashiga zamin bo'lmoqda.
Endilikda barchamizushbu ishonch va e'tiborga munosib mehnat qilib, yurtimiz ravnaqi yo'lida kelajak avlodga ta'lim-tarbiya berishni ustozlik sharafimiz va burchimiz deb bilmog'imiz kerak….
Dilnoza NORMATOVA,
18-umumta'lim maktabining boshlang'ich sinf o'qituvchisi.
18-umumta'lim maktabining boshlang'ich sinf o'qituvchisi.
