Айни кунда олиб борилаётган қурилиш-таъмирлаш ишлари ҳамда янги 2018-2019-ўқув йилига тайёргарлик жараёнини кузатиш мақсадида жорий йил “Обод қишлоқ” Давлат дастурига киритилган 3 ва 27-умумтаълим мактабларида бўлдик.
Дастлаб, “Янгиариқ” маҳалласида жойлашган, 784 ўринга мўлжалланган 3-умумтаълим мактабидаги мукаммал таъмирлаш ишлари ҳолатини кузатдик. Мактаб биносининг том қисми қайта ёпилиб, эшик-ромлар янгисига алмаштирилган, пол қисмига ранг бериш ишлари якунланган. Айни вақтда бинони ўраб турган ташқи чегара девори, кириш йўлаги, қурилиш чиқиндиларини олиб чиқиш, қозонхона қуриш ишлари қизғин кечяпти.
Таълим муассасамизда 75 нафар педагог-ходимлар ёш авлодга билим беради, ўқувчилар эса 887 нафарини ташкил этади, - дейди 3-умумтаълим мактаби директори Замира Қодирова. - Ўқитувчиларимиз ёрдамида ҳашар уюштириб, 27 та синфхона дарс ўтиш учун тайёр ҳолатга келтириляпти.
З.Қодирова келтирган маълумотлардан кўриниб турибдики, дарс ўтиладиган синфхоналар деярли шай ҳолатга келиб қолган. Мустақиллигимизнинг 27 йиллигига бағишланган янги шиор, тўртта секторга тегишли панно ўрнатилган.
Бироқ, ўрганишларимиз давомида таъмирлаш ишларининг кечикаётганини кузатдик. Бинонинг бир қисмида машғулот ўтилса, қолган қисмида эса таъмирлаш ишлари давом этаркан. Шу ўринда эртанги кунимизнинг эгалари бўлмиш ёш йигит-қизлар чанг кўтарилган ҳаводан нафас олиб дарсга қатнашадими, деган ҳақли савол ҳам пайдо бўлди.
Бу ердаги ишлар жорий йил 14 июндан бошлаган. Ҳозирда 70 нафар қурувчи-усталар ишлаяпти. Лекин... лаборатория хоналари, ошхона, фаоллар зали ҳамда спорт залда таъмирлаш тугалланмаган. 13 та қозонхона-иситиш тизими тўлиқ қуриб тугатилмаган. Мактаб дарвозаси ҳалигача негадир ўрнатилмаган, кўмирхона қурилмаган, қоровулхона ҳам тайёр эмас.
Қизиғи, жами неча квадрат-метр жой таъмирланаяпти, давлат бюджетидан қанча сумма ажратилган, нечта эшик-ромлар янгисига алиштириляпти, каби саволларимизга қурилиш-таъмирлаш ишларига масъул Самарқанд “Мансур сифат қурилиш” МЧЖ иш юритувчиси А.Облоқуловнинг жавоб қайтаролмагани бизни ажаблантирди.
Ғўбдин маҳалласидаги “Қизилқўрғон” қишлоғида жойлашган 27-умумтаълим мактабининг 144 ўринга мўлжалланган, ўтган 2017 йилда қурилиб, фойдаланишга топширилган биносида 8 та синфхона ҳамда лаборатория хонаси ўқувчиларга дарс машғулотларини ўтишга тайёр. Мактабнинг кириш жойининг ташқарисида янги шиор, ичкарига кираверишда кўргазмали қуроллар мавжуд. Муассасада 27 нафар педагог-ходимлар, 187 нафар ўқувчи бўлиб, айни вақтда фан ўқитувчиларидан уч-тўрт нафари иш режаларини тайёрлаш билан машғул. Бироқ, янги бинонинг спорт зали, фаоллар зали ва ошхонаси мавжуд эмас экан.
- Таълим масканимизнинг янги биноси ўқувчиларни қабул қилиш ва дарс ўтишга шай ҳолатда, - дейди 27-мактабнинг хўжалик ишлари бўйича директор ўринбосари Олим Абдуллаев. - Ёрдамчи ўқув биномиз ҳам жорий таъмирланмоқда. Битта қозонхона мавжуд бўлиб, яна иккитаси янгиланяпти.
Қўшимча бинодаги таъмирлаш ишларини кузатар эканмиз, том қисми қайта ёпилган, янги эшик-ромлар ўрнатилиб, пол қисми алмаштирилиб, ранг бериляпти экан. Қурвчи-усталарнинг айтишича, ҳудуддаги аҳоли ичимлик сувини асосан қудуқдан чиқариб олиши сабаб таъмирлаш ишларига сарфланадиган сувни маиший техника билан “Булунғур ариғи”дан олиб келинаётган экан. Бу ҳам иш суратининг кечикишига бир мунча таъсир қилаётган экан.
Қурилиш-таъмирлаш ишлари “Булунғур Дизайн” МЧЖ томонидан олиб борилиб, 9 та синфхона таъмирланиб, битта синфхона ва кичик хонанинг ўртасидаги девор олиб ташланиб, фаоллар залига айлантирилар экан. Иш юритувчини бўлса тополмадик, амалга оширилаётган ишлар хусусида ўзимизни қизиқтирган саволларга жавоб ололмадик. О.Абдуллаевнинг таъкидлашича, мактаб ҳовлисида гилос, ўрик ҳамда арча дарахтлари бўлиб, янгиларини экиб, парваришлаш учун сув танқислиги қийинчилик туғдираётган экан. Таълим маскани ҳудуди ҳам эски ва паст чегара тўсинлари билан ўралган бўлиб, яқин атрофдаги уйларда яшовчи кишиларнинг чорваси тез-тез ўтиб кетаркан.
22, 23, 45-умумтаълим мактабларидаги қурилиш-таъмирлаш ишлари август ойи охиригача ниҳоясига етказилиши айтилган эди. Мана, янги ўқув йили ҳам бошланди. Бироқ, жорий ва капитал таъмирлаш ишлари тўлиқ тугалланганича йўқ. 49-умумтаълим мактабининг спорт зали қурилиши ҳам кечикяпти. Ободонлаштириш ишлари ҳам жадаллашишини ва кўнгилдагидек якунланишини кутиб қоламиз.
Воҳид ЎРОЗАЛИЕВ,
“Bulung’ur hayoti” мухбири.
