Тобора янгиланиб бораётган Ўзбекистонимизда хотин-қизларимиз ҳар жабҳада илғорлар сафида боришмоқда. Жумладан, фермер аёлларимиз ҳам ўзларининг самарали меҳнатлари билан мамлакат тараққиётида фаол иштирок этишмоқда... Ана шундай “элим деб, юртим деб” ёниб яшаётган хотин-қизларимиздан бири “Мирзаариқ” маҳалласининг Қуммўғол қишлоғида яшовчи Фарида Нурбоева ўзининг самимийлиги, билимдонлиги, янгиликка интилувчанлиги билан маҳалла аҳолисининг ҳурматига сазавор бўлди.
Юз-кўзларидан табассум балқиб турган Фарида Нурбоеванинг асли касби ўқитувчилик. У Қуммўғол қишлоғи марказидаги 28-умумий ўрта таълим мактабида 20 йилдан буён бошланғич синф ўқитувчиси бўлиб ишлаб келмоқда. Унинг дастлабки қалдирғоч ўқувчилари айни пайтда жаннатмонанд юртимизнинг гуллаб-яшнаши учун турли соҳаларда сидқидилдан самарали меҳнат қилишмоқда.
– Иш июзасидан туманимизнинг ҳамма қишлоқ мактабларига борганман, - дейди Фарида опа Нурбоева. - Кундан-кунга чирой очиб бораётган қишлоқларга ҳавасим келади. Ўзимизнинг тошлоқдан иборат қишлоғимиизни шу обод қишлоқлар билан солиштириб кўраман.
- Биз ҳам ўзимиз яшаб турган қишлоғимизга озгина эътибор берсак қандай бўларкин-а? - деган савол билан турмуш ўртоғим Ҳусан акага ёрилдим. - Йўлимиз устидаги қаровсиз, бекор ётган тошлоққа дарахт экиб, боғ яратсак, - дегандим.
– Ажойиб фикр, - деди турмуш ўртоғим.
Шу билан иш бошланиб кетди. Қишлоғимиздаги ҳиммати баланд тракторчилар ёрдамга келишди. Қудратли техникалар билан 2 гектар майдондаги тошлар қириб олинди. Очиқ ва текис ер майдонига 550 туп карлик, юпқапўчоқ ёнғоқ кўчатлари эилди. Оралиқ экинлари сифатида беда, помидор, бодринг, бойимжон, болгар қалампири, картошка, пиёз каби сабзавот маҳсулотлари экилди.
Бундан уч йил олдин экилган ёнғоқларимиз жорий йилда нишона берди. Келгуси йилда тўлиқ ҳосилга кирадиган ёнғоқзор бугунги кунда қишлоқ жамолини очиб юборди.
– Тиниб- тинчимас Фарида Нурбоеванинг ташаббуси билан ташландиқ, эътибордан четда қолган тошлоқ ерда яратилган бу ёнғоқзорга қўшни маҳаллар фуқаролари ҳам ҳавас қилишмоқда, - дейди “Мирзаариқ” МФЙ хотин-қизлар фаоли Саодат опа Ҳасанова. - Янгиликка интилувчан хотин-қизларимиз меҳнати билан қишлоғимиз обод Ватанга айланмоқда.
Раббим ҲОТАМОВ.
