Мамлакатимизнинг барча жойларида бўлаётгани каби Булунғур ҳам улкан қурилиш майдонига айланган. Қурилиш объектларида эса хавфсизлик чораларига, Жумладан, ёнғин хавфсизлиги қоидаларига қатъий амал қилиш муҳимдир. Айниқса, бино ва иншоотларни лойиҳалашда оралиқ масофаларни сақланган бўлиши керак.. Шунингдек, танланган ер майдонлари юқори босимли газ қувури, кучланишли электр линиясининг муҳофаза ҳудудида жойлашмаган бўлиши керак.
Қурувчи фирма қурилиш-монтаж ишлари даврида вақтинча хизмат кўрсатувчи биноларнинг хавфсизлик талабларига қатъий риоя этилишига жавобгар саналади.
Ишлаётган инсонлар хавфсизлигини таъминлаш мақсадида қурилиш жараёнида ёнғин ва фавқулодда ҳолатлар вақтида эвакуация қилиш йўналиши бош режада аниқ кўрсатиб берилган бўлиши шарт. Бунда қурилиш ишлари амалга оширилаётган бинонинг том қисмига чиқиш учун зина ва ташқи ёнғинга қарши нарвонларни ўрнатишга ҳам жиддий ёндашиш керак.
Шунга алоҳида эътибор бериш керакки, ёнувчи қурилиш материалларини ёнғинга қарши оралиқларда сақлаш тақиқланади.
Майдони 2 ва ундан ортиқ гектарга тенг қурилиш ҳудудида камида иккита қарама-қарши ташкил этилган кириш жойлари бўлиши шарт. Йўллар йилнинг барча фаслларида ёнғин-қутқарув автомобиллари ўтиши учун қаттиқ қопламага эга бўлиши лозим. Кириш жойининг эни 4 метрдан кам бўлмаслиги керак.
Қурилиш майдонларининг иситиш хоналарида оловли ишларни бажаришга, шунингдек, электр калориферларидан ва инфрақизил нурланишли газли горелкалардан фойдаланишга йўл қўйилмайди. Негаки, қурилиш ишлари жараёнида меъёрий ҳужжатларда кўрсатилган норма ва талаблар инобатга олинса, турли нохуш ҳолатларга чек қўйган ва инсонлар ҳаёти ҳимоясини таъминлаган бўламиз.
Йўлдош УМРЗОҚОВ,
туман ФВБ НТБ бошлиғи, катта лейтенант.
