Бугун, Булунғур туманидаги “Янгиқўрғон” ҳамда "Истиқлол" маҳалла фуқаролар йиғинларида маҳалладаги нотинч оилалар аъзолари, уюшмаган ёшлар ҳамда маҳалла фаоллари билан Фуқаролик ишлари бўйича Жомбой туманлараро судининг раиси Ж. Файзуллаев иштирокида “Биз коррупция ва зўравонликка қаршимиз” шиори остида учрашуви бўлиб ўтди.
Учрашувда суд раиси Ж.Файзуллаев кун тартибида белгиланган “Коррупция – тараққиёт кушандаси” ва “Соддалаштирилган иш юритиш тартиби” мавзуларида маъруза қилиб, жумладан шундай деди:
- Инсоният тарихида давлатлар шаклланганидан буён коррупция уларни ичдан емирадиган ижтимоий иллат сифатида вужудга келди, ҳокимият ва бойлик учун ҳирслар таъсирида ривож топди. Коррупция сўзи-лотинча “пора бериб сотиб олиш” маъносини англатиб, мансабдор шахслар томонидан уларга берилган ҳуқуқ ва имкониятлардан шахсий бойлик орттириш мақсадида фойдаланишни ифодаловчи сиёсий ёки давлат бошқаруви соҳасидаги жиноий фаолият тушунилиши ҳақида сўз юритди. Шунингдек, зўравонлик, жисмоний зўравонлик, руҳий зўравонлик, оиладаги зўравонликлар одатда айнан бир шахсга нисбатан жисмоний ва руҳий зўрлик қилишда намоён бўлишини таъкидлади.
Бундан ташқари суд раиси Ж.Файзуллаев ўз сўзида давом этиб, кун тартибидаги “Соддалаштирилган иш юритиш тартиби тўғрисида”ги масала юзасидан ҳам сўз юритиб, жамият тараққий этгани сари мамлакатимизда олиб борилаётган суд-ҳуқуқ соҳасидаги изчил ислоҳотлар умумэътироф этилган ва халқаро тажрибада синалган халқаро-ҳуқуқий стандартларга мослаштирилаётгани, мазкур ислоҳотлардан кўзланган мақсад, фуқаролар ва юридик шахсларнинг ҳуқуқ ва эркинликларини, қонун билан қўриқланадиган манфаатларини ҳимоя қилиш ва судларга мурожаат қилишда уларнинг ортиқча оворагарчиликларини олдини олишдан иборат эканлигини таъкидлади. 
Учрашувда иштирокчиларнинг мавзу юзасидан берилган барча саволларига фуқаролик ишлари бўйича Жомбой туманлараро судининг раиси Ж.Файзуллаев тўлиқ ва атрофлича жавоблар қайтарди. Учрашув сўнгида ёши улуғ онахон халқимизга соғлик, юртимизга тинчлик осудалик тилаб, дуо қилди. Жамшид ФАЙЗУЛЛАЕВ,
фуқаролик ишлари бўйича Жомбой туманлараро судининг раиси.
