Statistik ma'lumotlarga ko'ra, dunyoda is gazidan zaharlanish tufayli sodir bo'ladigan o'lim holatlari alkogoldan zaharlanish sababli kuzatiladigan o'limdan keyin ikkinchi o'rinda turadi.
Ma'lumki, har yili kuz-qish mavsumida fuqarolarning o'z xonadonlaridagi isitish moslamalaridan noto'g'ri foydalanishi, xavfsizlik qoidalariga rioya qilmasligi oqibatida yurtimizda aholi o'rtasida is gazidan zaharlanish holatlari sodir bo'ladi. Eng yomoni, buning oqibatida o'nlab insonlar vafot etadi.
Shu o'rinda savol tug'iladi: xo'sh, is gazi o'zi nima? U qanday hosil bo'ladi? Is gazidan zaharlanganda insonda qanday belgilar kuzatiladi?
Is gazi juda "ayyor" - u asosan tabiiy gaz, ko'mir, o'tin cho'g'larining to'liq yonmasligi natijasida hosil bo'ladi. Uning eng xavfli jihati hech qanday hid va rangga ega emasligidadir. Shu bois ham, mutaxassislar is gaziga "sezdirmasdan o'ldiruvchi" deya ta'rif berishadi. Ushbu gaz organizmga nafas a'zolari orqali ta'sir etib, gemoglobin bilan kislorodga nisbatan 300 marotaba kuchli birikma - karboksigemoglobin hosil qiladi. Buning oqibatida gemoglobinning to'qimalarga kislorod tashish xususiyati keskin pasayib, gipoksiya, og'ir holatlarda esa anoksiyaga olib keladi. Hatto, zaharlanish oqibatida o'lim holatlari kuzatilishi mumkin.
Qanday omillar is gazidan zaharlanishga sabab bo'ladi?
Ma'lumki, kuz-qish mavsumida yurtimizda ko'pchilik aholi o'z xonadonlarida qo'lbola va standart talablariga javob bermaydigan isitish jihozlaridan foydalanadi. Aytish mumkinki, bu holat is gazidan zaharlanishga sabab bo'luvchi eng asosiy omillardan biri sanaladi. Shuningdek, gaz tarmoqlariga rezina shlang orqali ulanish, dudburonlarni o'z vaqtida tozalamaslik, uy ichini isitish maqsadida ochiq olovdan foydalanish, havo almashtiruvchi shaxtalar yoki tuynuklarni berkitib (to'sib) qo'yish ham zaharlanishga olib keladi.
Is gazidan zaharlanish qisqa muddat-larda yoki asta-sekinlik bilan yuzaga chiqishi mumkin. Bu esa o'sha muhitdagi havo tarkibida mavjud bo'lgan gazning konsentratsiyasiga bog'liq. Ya'ni juda yuqori konsentratsiyalarda zaharlanish tezda yuzaga chiqsa, gaz miqdori kam bo'lganda bu holat asta-sekin sodir bo'ladi.
Is gazidan zaharlanganda insonda qanday belgilar namoyon bo'ladi?
Agar odam ushbu gazdan kuchli zaharlangan bo'lsa, unda hushning yo'qolishi, turli xil tutqanoqlar va nafas to'xtashi kabi belgilar kuzatiladi. Is gazi konsentratsiyasi kam miqdorda bo'lganda mushaklar bo'shashishi, bosh aylanishi, quloqlarda shovqin, ko'ngil aynish, qusish, uyquchanlik, harakatlarning qisqa mud-datga faollashishi, keyinchalik harakat muvozanatlarining izdan chiqishi ro'y berishi mumkin. Ayrim hollarda esa alahsirash, gallyutsinatsiyalar, hushning yo'qolishi, tutqanoqlar, koma, nafas markazining falajlanishi, hatto, o'lim holati sodir bo'ladi.
Shunday ekan, har bir yurtdoshimiz is gazi xavfidan ogoh bo'lishi va bunga jiddiy e'tibor qaratishi, isitish moslamalaridan to'g'ri foydalanishi, eng muhimi, yuqoridagi sabablarning kelib chiqishiga yo'l qo'ymasligi lozim.
Jasur LAPASOV,
tuman FVB inspektori, katta leytenant
