Туман Маҳалла ва оилани қўллаб-қувватлаш бўлими ташаббуси билан туманимиздаги 1-сон касб-ҳунар мактаби залида “Истиқлол” ва “Меҳржон” МФЙ фуқаролари иштирокида “Аҳил оила куни” тадбири бўлиб ўтди. Тадбирда ҳар иккала маҳалла фуқаролари, нуроний отахон ва онахонлари, ёшлар, туман Маҳалла ва оилани қўллаб-қувватлаш бўлими бошлиғининг биринчи ўринбосари М. Қурбонова, туман “Амир Ҳамза” масжиди имом-хатиби М. Жомонқулов ва бошқалар иштирок этишди.
Тадбирда сўзга чиққан М. Қурбонова ва М. Жомонқуловлар тадбирни ўтказишдан мақсад - маҳаллада оиланинг тутган ўрни, ота-онанинг бир-бирига илиқ муносабати, тадбирга таклиф этилган аҳил оилаларнинг ибратли ҳаёт йўлларининг бошқаларга ўрнак бўладиган жиҳатлари билан таништириш, фарзанд тарбияси, оилада ўзаро ҳамжиҳатликни қарор топтириш, қўшничилик, қариндошчилик ришталарини янада мустаҳкамлаш ва бу борада ҳали амалга оширилиши лозим бўлган ишлар юзасидан фикрлар билдиришди.
Ибратли ҳаёт йўлларини босиб ўтишган, бугунги кунда маҳаллада “Аҳил оила” деб эътироф этилган, фарзандларини ўқитиб, илмли, касб-корли, тарбияли, комил фарзандлар қилиб тарбиялаб вояга етказган Истиқлол МФЙда истиқомат қилувчи Бурхон Эшимов, Шуҳрат Жалилов, Меҳржон МФЙда истиқомат қилувчи Ғуломжон Боймуродов, Мақсудхон Мухторовларнинг оила аъзолари тадбир меҳмонлари бўлишди. Улар тадбир қатнашчиларига оилалари, босиб ўтган ҳаёт йўллари ҳақида сўзлаб беришди. Шунингдек, тадбирда туман Маданият уйи хонандалари Фароғат Сатторова, Мангуберди Абдусатторов ва туман 9-сон Мусиқа ва санъат мактаби ўқувчиси Зуҳра Донабоевалар ижросидаги куй ва қўшиқлар иштирокчиларда катта тассурот қолдирди.
Тадбир сўнгида туман Маҳалла ва оилани қўллаб-қувватлаш бўлими бошлиғининг биринчи ўринбосари Маҳбуба Қубнонова “Аҳил оила” деб эътироф этилган тадбир меҳмонлари - Б.Эшимов, Ш.Жалилов, Ғ.Боймуродов ва М.Мухторовларга ташаккурнома ва совғалар тақдим этди.
Тўлқин ШЕРБОЕВ.
