Гап туман Марказий шифохонасининг 90 ўринга мўлжалланган туғруқ бўлими ҳақида бормоқда. Бу ерда 20 нафардан ортиқ акушер-гнеколог шифокорлар ва доя ҳамширалар кеча-ю-кундуз туманимиз аҳолисига беминнат тиббий хизмат кўрсатишмоқ
Ярим тун, соат 3.00.
- Қаҳрамон Носирович, - деди хонага шошилиб кирган доя ҳамшира. - Бирин-кетин уч нафар ҳомиладор аёлларни олиб келишди. Улардан бирининг аҳволи сал оғирроқ. Сизнинг маслаҳатингиз керак бўлди.
Касаллик варақасини кўздан кечираётган қўли эм шифокор шошилиб қабулхонага кирди. Ҳомиладор аёлни синчиклаб текширди. Ташхис қўйиб дори-дармон буюрди. Қаттиқ тўлғоқ натижасида ҳаяжонланган аёл бироз ўзига келди. Бироздан сўнг хона узра чақалоқ йиғисибаралла янгради
- Яхшиямки ўз вақтида олиб келибсизлар, - деди биринчи тоифали шифокор, акушер-гинеколог Қаҳрамон Носирович ҳомиладор аёлнинг қариндошларига. - Тўлғоқ енгил ва осон кечди, муҳими, полвон йигит туғилди, - деди ширинсуханлик билан.
Бу хушхабардан туғруқ уйи эшиги олдида ҳажонланиб турганлар бир-бирларини самимий қутладилар..
Туғруқ уйи эшигининг олди кеча-ю-кундуз одамлар билан гавжум. Туғиш арафасидаги аёллар, ёш келинчаклар, аёллар касаллиги билан оғриган беморлар.... Шифокорларнинг қўли-қўлига тегмайди, бир муддат ҳам бўш вақт йўқ. Баъзан ҳатто тушлик ҳам эсдан чиқиб қолади. Ана шундай гавжум жойда, кечалари ҳам чироғи ўчмайдиган бинода ишлаётган ёш шифокор, акушер-гинеколог Қаҳрамон Тўраев ўзининг билимдонлиги, янгиликка ўчлиги, ширин сўзлиги ва тиним билмас ғайрат-шижоати билан эл ҳурматига сазавор бўлди. Шифокорликка ёшлигидан меҳр қўйган Қаҳрамон Тўраев ўзи ўниб ўсган Кичик Килдон қишлоғидаги 42-умумтаълим мактабини “аъло” баҳоларга битириб, ҳужжатларини Самарқанд Давлат тиббиёт институтининг терапия бўлимига топширди.
У студентликнинг “олтин даври”да институтнинг ўқитувчи-профессорларидан тиббиёт билими сирларини қунт билан ўрганди. Айниқса, ўқув амалиёт пайтида турли хил касалликларнинг олдини олиш, уларни даволаш, муолажа қилиш ишларини тинмай ўрганди.
2005 йилда институтни муваффақиятли битирган Қаҳрамон Тўраев дастлабки иш фаолиятини ёш шифокор сифатида Республика шошилинч тиббий ёрдам илмий маркази Самарқанд филиалида даволовчи врач бўлиб ишлашдан бошлади. Кейинчалик клиник ординатурада, Самарқанд шаҳар 1-сонли туғруқ мажмуасида врач-акушер-гинеколог бўлиб ишлади. 2016 йилдан бошлаб Булунғур туман Тиббиёт бирлашмасидаги туғруқ бўлимида врач-акушер-гинеколог бўлиб ишламоқда.
- Биз меҳнатсевар, янгиликка интилувчан шифокор Қаҳрамон ака билан анча йилдан буён бирга ишлаб келаяпмиз, - дейди шифокор Сабрина Солиева. - Халқ ҳурматини қозонган шифокор Қаҳрамон Носирович иш давомида энг замонавий янги усулларда беморларни чуқур текширувдан ўтказиб, даволаш ишларини олиб бормоқда. Айни пайтда карантин даврида биз жамоамиз билан биргаликда Қаҳрамон Носирович бошчилигида беморлар ўртасида “COVID-19“ ҳақида кенг қамровли тушунтириш ишларини олиб бораяпмиз.
- Чарчаш нималигини билмай элимизга сидқидилдан хизмат қилаётган ёш шифокорларимиздан бири Қаҳрамон Тўраевга ҳамма ҳамкасблари ҳавас қилишади, - дейди туман Тиббиёт бирлашмасининг фахрий акушер-гинекологи Абдусаид Норматов. - Унинг тиббиёт соҳасида амалга ошираётганишларига ҳаммамиз ҳавас қиламиз.
Раббим ҲОТАМОВ.
