Ҳозирги давр кишилари замонга қараб интилишаётган бир пайтда миллий анъаналаримизга ҳам содиқ қолаётганлар кўпчилик. Қувонарлиси, улар боболаримиз ва момоларимиз йўлидан бориб, касбини давом эттириб келишяпти. Нодира Бойбўтаева ҳам “Қўнғирот” маҳалла марказидатикув хонаси очиб, аёллар учун кўйлак, нимта, халат, чопон каби миллий либослар тикиб келади.
Қарийб 15 йилдан буён шу касб билан шуғулланиб келган Нодира опа айни вақтда келини Фароғат Бойбўтаева ҳамда ёрдамчиси Зарбувиш Маҳмудова билан қизғин иш устида.
– Мен бу касбни момоларимиздан ўрганганман, - дейди Н.Бойбўтаева фахр билан. – Ҳозирги кунда ҳам бундай либосларга қизиқувчи ва доимий буюртма берувчилар талайгина. Замонавий матоларга ҳам миллий безак солиб, хотин-қизлар талабига мос равишда чиройли, бежирим либос тикишга ҳаракат қиламиз.
Н.Бойбўтаева бундан ўн йил аввал “Tashabbus-2008” Республика кўрик-танловининг туман босқичида 1-ўринни қўлга киритиб, танловнинг вилоят босқичида ҳамда мазкур кўрик-танловнинг жорий йил ўтказилган туман босқичида ҳам фаол қатнашиб келган.
Тикув хонасидаги 5 дона тикув машинасидан 3 таси кредит асосида келтирилган бўлиб, умумий ва мураккаб чокларни тикишга мўлжалланган. Опанинг икки нафар шогирди ҳам ёрдамга келиб, иш авжига чиққанда 5-10 тагача либос тикиларкан. У кишининг касбий йўлини ва ишини келажакда келини Ф.Бойбўтаева давом эттирар экан. Нодира опа ҳам унинг қизиқиши ва кийим тикиш сирларини пухта эгаллаганига ишонади. Демак, миллий руҳ ва анъана давом этади.
Воҳид ЎРОЗАЛИЕВ.
