Миллий ҳунармандчилик касб-ҳунар коллежининг 3-босқич ўқувчиси Мўжиза Маҳмудова олти йилдан буён либос тикиш ва унга безак солиш билан машғул. У қизиқиш билан аёллар ва болалар либослари, дўппи, кашта ва қубба тикиб, жемфер ҳамда рўмол тўқийди. Миллий ва замонавий либосларга чирой бахш этувчи рангли ва мунчоқли безак беради. Намуна сифатида янги ғояларини акс эттириш мақсадида уларнинг лойиҳаларини тайёрлайди. Бу жараёнга қизиқувчи 5-6 нафар қизларга ҳам тикувчилик ва тўқувчилик сирларини ўргатмоқда.
- Тайёрланган лойиҳа асосида янги кўринишдаги либослар тикилади, - дейди Мўжиза. - Кейин унга рангли мунчоқлар ёрдамида безак солинади. Миллийлигимизни акс эттирувчи зардўзликка қунт билан ёндашиш, замонавий либосларнинг янги кўринишларини яратишга алоҳида эътибор қаратишга ҳаракат қиламан. Шунда у чиройли ва бежирим чиқади. Мунчоқлар билан безак бериш жараёни эса завқли машғулотимга айланган.
У тикувчилик ва тўқувчилик борасида янгиликлар киритиш учун изланиш билан бирга турли танловларда ҳам фаол қатнашиб келади. Жумладан, 2015 йилда “Баркамол авлод” болалар марказида томонидан ўтказилган “Юртим зеболари” танловининг вилоят босқичида биринчи даражали диплом билан тақдирланган. Тадбиркорлар ва ишбилармонлар ҳаракати – Ўзбекистон либерал-демократик партияси томонидан ўтказилган “Мулкдор оила-2016” лойиҳаси ҳамда “Ишбилармон оила-2016”, “Ташаббус-2017” Республика кўрик-танлови ҳамда 2017 йил Зулфия номидаги давлат мукофоти учун ўтказилган танловда вилоят босқичининг фаол иштирокчисига айланди.
Келажакда у битирувчилар учун берилаётган имтиёзли банк кредити олиб, тикув цехи очишни ҳамда коллежни битираётган бир нечта чевар қизларни иш билан таъминлашни ўз олдига мақсад қилиб қўйган.
Воҳид ЎРОЗАЛИЕВ.
