Кичик Кильдон маҳалласида яшовчи 75 ёшли Саҳриной момо Бобоқулова ўз даврида 50 йил пилла боқиб,моҳир пиллакор, деб донг таратган. Айни пайтда момонинг бу хайрли ишларини келинлари ва неваралари давом эттиришмоқда.
- Пилла парваришлашни қайнонамдан ўрганиб, 20 йилдан буён пилла боқиб келаяпмиз, - дейди келинларидан бири Мавжуда опа. - У кишининг маслаҳатлари асосида пилла боқиб кам бўлганимиз йўқ. Айни кунларда ҳам, ҳасса таяниб бўлса-да, пиллахонамизга тез-тез келиб маслаҳат бериб турадилар.
- Ёшлигимда пилла боқиш менинг энг хши кўрган ишларимдан бири эди, - дейди Саҳриной момо кулиб. - Бугунги кунда шу ишимни давом эттириб келаётган келинларим ва невараларимнинг ишлариданқувониб кетаман.
- Ўтган 2017 йилда оиламиз аъзолари билан икки қути пилла боқиб, давлатимиз хазинасига биринчилардан бўлиб режадаги 163 килограмм ўрнига 186 килограмм пилла топширдик. Натижада, қиммабаҳо совға билан тақдирландик. Шу кунларда боқаётган пилла қуртларимиз тўртинчи уйқудан турди. Мутахассислар фикрига қараганда бу йилги пилламиз чўғи ўтган йилдагига нисбатан анча кўп бўлиши кутилмоқда. Пилла боқишимизда овсиним Гулшода, фарзандларимиз Нодирбек, Азамат, Адҳамбеклар яқиндан ёрдам беришмоқда
Раббим ҲОТАМОВ.
