Яқинда“Соҳибкор” маҳалласида жойлашган11-мактабгача таълим муассасасида барча мактабгача таълим муассасаларида ишлаётган ҳамширалар фаолиятига бағишланган кўргазмали семинар бўлиб ўтди. “Тарбияланувчиларнинг тўғри овқатланишини ташкил этиш ва шахсий гигиена қоидаларига амал қилишларининазорат қилиш ҳамшираларнинг муқаддас бурчидир” мавзусида ўтказилган ушбу семинарда туман Тиббиёт бирлашмаси шифокори Д. Шертоева, туман мактабгача таълим бўлими мудири У. Гўбаева, шунингдек тумандаги мактабгача таълим муассасаларида фаолият кўрсатаётган ҳамширалар, ота-оналар, боғча жамоаси иштирок этди.
Тадбир иштирокчилари дастлаб ушбу мактабгача таълим масканининг фаолияти, яъни, жажжи кичкинтойлар учун яратиб берилган шарт-шароитлар, ошхона, машғулотлар ўтказиладиган хоналар, ётоқхоналар ҳамда улар учун тайёрланаётган таомларнинг сифати билан яқиндан танишдилар.
Семинарни туман мактабгача таълим бўлими мудири У. Гўбаева очиб, ушбу масканларида фаолият кўрсатаётган ҳамширалар зиммасига катта масъулият юклатилганлиги, жажжи кичкинтойларнинг ҳар жиҳатдан соғлом, жисмонан етук бўлиб вояга етишишларида уларнинг ўрни беқиёс эканлигини алоҳида таъкидлаб ўтди ва тадбир иштирокчиларини Наврўзи-олам билан самимий қутлади. Туман Тиббиёт бирлашмаси шифокори Д. Шертоева ва бошқалар ўз навбатида энг аввало ота-оналар кичкинтойларни тоза кийинтиришлари, бетоб бўлиб қолганларида ҳамшираларнинг уларга биринчи тиббий ёрдам кўрсатишлари, ўз вақтида тўғри овқатланишлари ҳамда шахсий гигиена қоидаларига тўлиқ амал қилишларини назорат қилишлари, мунтазам равишда тиббий кўрикдан ўтказдирилиб борилиши билан боғлиқ ҳамда бошқа долзарб масалалар бўйича ўз фикр -мулоҳазаларини билдирди.
11-мактабгача таълим муассасаси ҳамшираси Лола Усмонова ҳамда боғча тарбиячилари томонидан кичкинтойлар иштирокида “Соғломжон - полвонжон”,”Соғлом танда - соғлом ақл” каби мавзуларда тайёрланган спорт мусобақалари, саҳна кўринишлари тадбир иштирокчиларига манзур бўлди. У билимдон, болажон ҳамшира сифатида боғча жамоасининг, ота оналарнинг ҳурматини қозаниб келмоқда. Туман мактабгача таълим бўлими ҳамда боғча маъмуриятининг Фахрий ёрлиқлари, эсдалик совғалари билан тақдирланган.
- Боғчамизда туман миқёсидаги семинарлар ва бошқа тадбирлар тез-тез ўтказилиб турилади, - дейди 11-МТМ мудираси Мақсуда Олимова. Ҳамширамиз Лола Усмонова барча тадбирларда фаол иштирок этиб, ўн беш йилдирки ўзининг ташкилотчилигини, изланувчан, ўз устида қунт билан ишлайдиган моҳир тиббиёт ходими эканлигини намойиш этиб келмоқда.
Семинар иштирокчилари унинг фаолиятини, кўп йиллик тажрибасини атрофлича ўрганишиб, ёш ҳамшираларга ибрат сифатида кўрсатишди.
Раббим ҲОТАМОВ.
