Инспекциямиз 2018 йил август ойидан иш бошлаган. Ўтган даврдан ҳозирга қадар инспекциямиз ходимлари бошқа вазифалар қатори тумандаги қишлоқ хўжалик техникалари, тракторлар, тиркамалар, тележкалар, агрегатлар сонини аниқлаш, уларни рўхатдан ўтказиш, техник ҳолатини назорат қилиш, ҳужжатларини расмийлаштириш ва уларга сертификатлар бериш ишлари билан ҳам шуғулланишмоқда.
Ҳозиргача рўйхатдан ўтказилган 132 та турли русумдаги қишлоқ хўжалик тракторларининг 83 тасига янги давлат рақам белгилари ва техник паспортлари берилди, 49 тасининг эски намунадаги давлат рақам белгилари ва техник паспортлари янгисига алмаштирилди. Шунингдек, 38 нафар трактор ҳайдовчиларининг 32 нафарига янги намунадаги “Тракторист-машинист” гувоҳномаси берилди. 6 нафарининг эски намунадаги “Тракторист-машинист” гувоҳномаси янги намунадаги гувоҳномага алмаштириб берилди.
Ҳадемай қишли-қировли кунлар ҳам ортда қолиб, кунлар илиб, оби-тобига келган ерларни шудгорлаш ва экин-тикин ишлари ҳам бошланади. Бунга эса ҳозирданоқ техникаларни шай ҳолатга келтириб қўйиш лозим. Шу боисдан ҳам инспекциямиз мутахассислардан иборат гуруҳлар иштирокида мавжуд техникаларни техник кўрикдан ўтказишмоқда. Ҳозиргача ҳисобдаги 307 та турли русумдаги тракторларнинг техник ҳолатлари текширилиб, техник кўрикдан ўтказилишига эришилди. Инспекциямиз мутахассислари томонидан ҳозирга қадар тумандаги 18 та ОВХ пуркагичлари, 15 та минерал ўғит сепкичлари, 6 та ер текислагич ва 16 та турли русумдаги ғалла ўриш комбайнлари ҳамда 32 та ер шудгорлаш тракторлари мавсумга шай ҳолга келтирилиб, уларга сертификатлар берилди.
Инспекциямиз ходимлари ва мутахассислари томонидан туман ҳудудидаги қишлоқ хўжалиги техникалари ва тиркамалари, тракторлари ҳисобга олинмоқда. Бу ишда фуқароларимиз ҳам фаол бўлишини истардик. Ҳали рўйхатга олинмаган техника эгалари бизларга мурожаат қилишса, биз уларнинг техникаларини рўйхатга қўйиш, гувоҳномалар бериш, техник кўрикдан ўтказиш, давлат рақам белгилари олишда амалий кўмак беришга тайёрмиз.
Ғолиб ҚОДИРОВ,
Республика Бош прокуратураси ҳузуридаги
Агросаноат мажмуи ва озиқ-овқат хавфсизлиги
таъминланиши устидан назорат қилиш инспекцияси
туман бўлими бошлиғи.
