МЕҲР
Барча жонзотларга хос, онгли мавжудот - инсонгагина тўла мос бўлган бу тушунчанинг маъно-мазмунига янгича таъриф ва тавсиф битилаётгандек, гўё.
“Тождорвирус”га қарши кураш, ўзини ва ўзгаларни асрашда меҳр, деб аталмиш она сути билан танимизга кирган МЕҲР бугун ҳар биримизни эзгуликка чорламоқда. Кимдир хайрия қилиб, кимдир беминнат хизмати, бобо-момоларимиз пурҳикмат насиҳату- маслаҳати билан ҳожатманд юртдошларимизга далда бўлмоқда.
Меҳр жипслик, хайрихоҳликнинг таъсирини янада кучайтириб, қадрият, маънавият илдизларига янгича куч бағишламоқда. Бу куч оила, жамият, давлат бирлиги ва қудратининг тимсолидир.
САДОҚАТ
Карантин шароитида меҳр-мурувват кўрсатиб, саховатпешаликдек эзгу удумга садоқат билан ёндашаётганларнинг сон-саноғи йўқ. Бири озиқ-овқат маҳсулотлари тарқатиб, дуо олаётган бўлса, бошқаси беминнат хизмати билан савоб соҳибига айланмоқда.
Энг ибратлиси, меҳр, садоқат ва оқибатни маънавий бойлик сифатида ҳар қандай моддий тўкинликдан устун, деб биладиган халқимиз бугунги синов даврида эзгу амалларга садоқатини яна бир бор намоён этмоқда. Эзгулик ҳеч қачон ўлмайди, агар унинг илдизи САДОҚАТ, деб аталмиш обиҳаётдан баҳраманд бўлса!..
ОҚИБАТ
Ҳар бир иш, юмушдан кўзланган мақсад - якуний натижага эришмоқдир. Буни қисқача ОҚИБАТ, деб атасак пурмаъно сўзимизнинг обрў-нуфузига зид иш тутмаган бўламиз.
Карантин шароитида кўпчилигимиз бугун ...лар сони кўпаймадими, деган хавотирда яшамоқдамиз. Дунёнинг турли давлатларида рўй бераётган воқеаларга ҳам бефарқ эмасмиз.
Ўзимизда эса “Тождорвирус”га қарши курашнинг фақат Ўзбекистонга хос бўлган амалиёти кенг жорий этилмоқда. Ватандошларнинг хориждан оммавий, ташкилий равишда қайтарилиши, давлат томонидан карантин ва даволаниш харажатларининг тўлиқ қопланиши, карантин ва даволаш марказларининг янги тизими яратилиши... Буларнинг барчаси юртимизда муҳим ижтимоий сиёсатни амалга ошириш - Сиз, биз - барчамиз кутган хайрли оқибат эмасми?!
САБР
У – чидам, матонат, қаноат, тоқат каби кўпдан-кўп инсонийлик тамойилларини ўзида мужассам этган азалий ва абадий қадрият.
Очарчилик, қаҳатчилик, қатағон ва уруш каби оғир, ночор даврларда ҳам халқим оч, яланғоч бўлса-да, САБРга суяниб, Аллоҳдан кўнгил мулкига таяниб яшаган! Ойнинг ўн беши ёруғ бўлса, ўн беши қоронғу бўлади, деган нақл кўнгилга эртанги кунга бўлган умид шамчироғи битилганидан ... шу кунларга етиб келганмиз. Қачонки, қалбда шу шамчироқ хиралашса, сабр, тоқатдек одамий тамойилга бўйсуниш талаб этилади.
Бугун ана шу тамойилга мос иш юритаяпмизми? Тождорвирус балосини давлатимиз якка ўзи бартараф этиши гумон: халқаро ҳамжамият билан ҳамкорликда иш олиб борилаётганлиги сабаби ана шунда! Шошма-шошарлик бу ишда ҳам САБРнинг ўрнида бўй кўрсатаётганлиги бор гап. Карантиннинг оддий талабларини ҳам бузаётганларни сабрли, тоқатли, деб аташ мумкинми? Ушбу сатрлар қоғозга туширилаётган ва Сиз танишаётган пайтгача ўтган вақт мобайнида уларнинг сони неча юз қоидабузар ҳисобига кўпаяди!
Давлат, ҳукумат биздан сабрли бўлишни, уйимизда қолишнни, касалликни юқтирмасликни талаб этмоқда. Бу талабдан мақсад энг аввало, ўз саломатлигимиз, оила аъзоларимиз омонлиги, пировардида барчамизни бало-қазодан асрашдир. Шундай экан, сабрли, тоқатли бўлайлик, азиз Ватандош! Зеро, сабр таги сариқ олтин деганларидек, ёруғ, нурафшон кунларимиз Сиз ва биз - барчамизни узоқ куттириб қўймайди!..
Қувондиқ ХАЛИЛОВ.
