Saxiy quyoshning yorqin nurlari ostida "Yangi O'zbekiston" massivida qurilayotgan zamonaviy binolarda pardozlash ishlari qizg'in davom etmoqda. Qo'li gul quruvchilarning qo'li-qo'liga tegmaydi. Bir tomonda suvoqchi-pardozlovchilar, bir tomonda kafel teruvchilar, santexniklar, yana bir tomonda elektr ustalari g'ayrat bilan ishlamoqdalar. Yana bir tomonda esa ko'tarma kran qurilish materiallarini kerakli yuqorilikgacha ko'tarib berayapti.
-"Yangi O'zbekiston" massivida bosh reja asosida 20 ta 5 qavatli zamonaviy, chiroyli uylar quriladi, - deydi ish boshqaruvchi Oybek Davronov. - Qurilish ishlarini "Agromir Buildings" MChJ quruvchilari amalga oshirishmoqda. Hozirgacha 4 ta 5 qavatli uylar qurilib, ularda so'nggi pardozlash ishlari olib borilmoqda. Bu uylar yaqin kunlar ichida o'z egalariga tantanali ravishda topshiriladi. Bundan tashqari yana 5 ta besh qavatli uy-joy uchun beshta poydevor chuqurida beton ishlari nihoyasiga yetdi. Qurilish ishlarini Jahongir Namozov, Jumanazar Ahmatov, Jahongir Shodmonov kabi ish boshqaruvchilar boshchiligidagi 100 nafarga yaqin Bulung'ur, Jizzax va Samarqandlik tajribali quruvchilar olib borishmoqda. O'z kasbining mohir ustasi bo'lgan Sherzod Shodiyev, Sardor Abdurahimov, Tuyg'un Ismoilovlar peshqadamlar safida boshqalarga o'rnak bo'lishyaptilar.
"Olmazor" MFYga qarashli bu massivda 2021-yilda qurilgan 4 ta 5 qavatli uylarda aholi huzur qilib yashamoqda. - Biz oilamiz bilan 2021-yilda mana shu zamonaviy uylarning uchinchi qavatidagi uyimizga ko'chib kelgan edik, - deydi fuqaro Dilfuza Yadigarova. - Har tomonlama qulaylikka ega bo'lgan xonadonimizdagi ichimlik suvi, tabiiy gaz va elektr energiya jonning rohati ekan. Bu uch xonali uyda uch nafar farzandimiz, men va turmush o'rtog'im rohat-farog'atda yashamoqdamiz. Yana bir qulayligi: massivimiz ro'parasidan Samarqand - Toshkent katta avtomagistrali o'tgan. Ko'chaga shunday chiqsangiz, xohlagan tomonga bemalol borib kelasiz.
Mo'jazgina shaharchaga aylanib borayotgan bu massivda kelgusida aholi bandligini ta'minlash maqsadida bolalar bog'chasi, savdo va maishiy do'konlar, kichik korxonalar qurilishi ko'zda tutilgan. Har bir ko'p qavatli uy oldidagi bolalar maydonchalari,suhbatlashadigan joy-ayvoncha va skameykalar aholi xizmatida. Yangi uyga birinchilardan bo'lib ko'chib kelgan "Olmazor" MFY fuqarosi, tadbirkor Dilfuza Yadigarovaning tashabbusi bilan kuni kecha birinchi oziq-ovqat oilaviy savdo do'koni ishga tushirildi. Rabbim HOTAMOV.
