Дунё халқлари қатори бизнинг ўзбек халқи ҳам ҳамма тинч, осойишта хаёт кечириши тарафдоридир. Айниқса, бугунги кунда бизнинг юртимизда серқирра ўзгаришлар, маданий, маърифий, сиёсий, техник янгиликлар яратилмоқда. Юртбошимизнинг халқ фаровонлиги йўлидаги фармон ва қарорлари ҳаётга тадбиқ этилмоқда.
Айниқса, Ўзбекистон мустақил давлат деб эълон қилингандан сўнг юртимиз қучаётган зафарлар, халқимизнинг фидокорона меҳнати туфайли яратилаётган дунёвий янгиликлар ўзга юртларни лол қолдирмоқда. Лекин, гуруч курмаксиз бўлмайди, деганларидек, баъзи юртдошларимиз бойлик изидан, аниқроғи “ҳаром бойлик” изидан қувиб, қонунларимизга зид ишлар қилиб, жиноятга қўл ўрмоқдалар.
Улар кимлар? Улар – виждонини, одамийлигини пулга сотганлар. Улар – бойлик изидан қувлаб, кейин тубсиз жарликка қулаб кетаётганлар. Улар инсонийлик гуруҳига, миллати, оиласи шаънига доғ тушираётганлардир.
Лекин, жиноят ҳеч қачон жазосиз қолмайди. Бу дунёда ҳам, у дунёда ҳам ҳар бир жиноятга жазо бор.
Ёшгина жувонларни, ҳали ҳаёт нималигини тушуниб етмаган гулдек қизларни алдаб йўлдан ураётганлар, чет элга энага ёки бошқа бир касб эгаси бўлиб ишлайсан, деб алдаб олиб кетаётганлар, паспортларини олиб қўйиб қўрқитиб, уларни хор-у зор қилиб сотиб юбораётганлар, жарақ-жарақ “долларларни” санаб олаётганлар, вақти етиб худонинг қаҳрига учраб, қонун олдида жавоб бермоқдалар.
Кимларнингдир бахтсизлигига, азобли кўзёшлари эвазига келган бойлик ҳеч қачон буюрмайди.
Ана шундай нопок йўл билан пул топаётган, одам сотиб кимларнидир қон йиғлаётган Бахтигулнинг бахти қаро бўлди, ҳаром пуллар эвазига сотиб олган “Cobalt” машинасида автоҳалокатга учраб, икки оёғидан жудо бўлди. У энди ҳеч кимга керак эмас, ҳатто, унинг оиласини бузиб, қўйнига кириб олган хуштори Алибек энди унга қайрилиб ҳам қарамайди. Уни ўша сотилган гулдек, номуси поймол бўлган қизларнинг, ота-оналарнинг қарғиши урди, қонун ҳимоячилари эса Бахтигулнинг шерикларини қўлга олишди. Бахтигул-чи? Бахтигулга ана шу жазонинг ўзи етади.
Россияда бригада туздим, пулини ойма-ой бераман деб, ҳамқишлоқларини Крюково шаҳрига ишга олиб кетиб, паспортларини йиғиб олиб, кейин сотиб юборган Раҳматиллодан бутун қишлоғи юз ўгирди. Унинг устидан жиноий иш қўзғатилиб, узоқ муддатга озодликдан маҳрум этиш жазоси берилди.
Бундай калтафаҳм, бойлик деб ўзини жардан ташлайдиган юртдошларимиз йўқ эмас. Лекин, одам савдоси билан шуғулланганлар учун барибир афсус-надомат нақд, сўнгги пушаймон эса доим ўзингга душман бўлади.
Биз тенг ҳуқуқли, қўлини узатса ҳар жойга етадиган демократик давлатда яшаймиз. Биз учун ноқонуний топилган бойлик ҳаромдир. Нафақат одам савдоси, балки, бошқа ҳуқуқбузарликларга қўл урганларнинг барчаси қонун олдида жавоб беради. Ана шуни ҳар бир фуқаро эсдан чиқармаслиги керак.
Ф. ШУКУРОВ.
