Туманимиздаги мавжуд экин майдонлари, шу жумладан фермер хўжаликлари тасарруфидаги экин майдонлари ва чорвачиликка ихтисослаштирилган фермер хўжаликлари ҳамда аҳолидаги шахсий чорва молларини назорат қилиш, уларга ҳар томонлама кўмаклашиш ҳам инспекциямиз фаолияти турларидан саналади.
Айни пайтда туманимизда 11390 гектар экин майдонлари мавжуд бўлиб, шундан 7890 гектари сувли экин майдонлари ва 3500 гектари эса суғориш имконияти бўлмаган лалми ерлар ҳисобланади. Шунингдек, турли хил қишлоқ хўжалик маҳсулотлари етиштириш билан шуғулланаётган мавжуд 1711 та фермер хўжаликларидан 82 таси уруғлик ғалла етиштиришга ихтисослашган. Ходимларимиз вақти-вақти билан ушбу фермер хўжаликларида бўлиб, фермерларнинг ғалла майдонлари учун зарур бўлган минерал ўғитлар билан таъминланишида, агротехник ишлов даврида техника ва ёнилғи билан таъминланишида ҳамда экинларни суғориш ишларида оқар сув етказиб берилишини назорат қилиш билан бирга уларга амалий ҳамда ҳуқуқий кўмак беришмоқда.
Шунингдек, чорвачиликка ихтисослаштирилган 34 та фермер хўжалиги ҳисобидаги ва аҳоли хонадонларидаги мавжуд қорамоллар, қўй ва эчкилар ҳамда йилқиларнинг умумий сони аниқланиб, хатловдан ўтказилди. Хатловга кўра жорий йилнинг март ойига қадар 34 та фермер хўжаликлари ҳисобида 1396 та қорамоллар, 911 та қўй ва эчкилар, 85 та йилқилар борлиги ва аҳолида жами 101450 та қорамоллар, 135484 та қўй ва эчкилар, 1188 та йилқилар борлиги аниқланди.
Инспекциямиз ходимлари белгиланган иш режасига кўра тўртта сектор ҳудудларига бўлинган ҳолда чорвачилик фермер хўжаликларида бўлишиб, улар билан суҳбатлар уюштиришмоқда. Чорва моллари учун озуқа ва яйлов учун майдонлар ажратилишида кўмаклашилмоқда.
Маҳмуд ТОШБОЕВ,
Вазирлар Маҳкамаси ҳузуридаги
Агросаноат мажмуи устидан назорат қилиш
инспекцияси туман бўлими бошлиғи ўринбосари.
