Мамлакатимизда тадбиркорликни ривожлантириш, қулай инвестиция муҳитини шакллантириш, экспортбоп маҳсулотлар ишлаб чиқариш ҳажмини кўпайтириш, иқтисодиётда кичик бизнес ва хусусий тадбиркорлик улушини ошириш борасида кенг кўламли ишлар амалга оширилмоқда. Жумладан, айни жараёнда тадбиркорлик субъектларининг ҳуқуқ ва манфаатларини таъминлашга алоҳида эътибор қаратилмоқда.
Президентимизнинг 2018 йил 27 июлдаги “Тадбиркорлик субъектларининг ҳуқуқлари ва қонуний манфаатларини ҳимоя қилиш тизимини янада такомиллаштириш чора-тадбирлари тўғрисида”ги фармони ушбу йўналишдаги ислоҳотларда муҳим дастуриламал бўлиб хизмат қилмоқда. Фармонда 2018 йил 1 апрелга қадар якка тартибдаги тадбиркор мақомини йўқотган жисмоний шахслар ва 2018 йил апрелдан молиявий-хўжалик фаолиятини амалга оширмаётган (шу жумладан, фаолиятини вақтинча тўхтатган) якка тартибдаги тадбиркорлар, давлат рўйхатидан ўтмасдан тадбиркорлик фаолияти билан шуғулланганлиги учун бир йиллик қатъий белгиланган солиқ суммаси ҳисобланган жисмоний шахсларга қатъий белгиланган солиқ ва ушбу қарздорлик учун ҳисобланган пенялар, шунингдек, молиявий жарималар ва суд харажатлари (суд чиқимлари бундан мустасно) бўйича ҳисобланган қарздорликни ҳисобдан чиқариш назарда тутилган. Қарздорликни ҳисобдан чиқариш учун улар 2019 йил 1 июлга қадар муддатда тадбиркорлик фаолиятини тиклаши ёки қонун ҳужжатларида белгиланган тартибда давлат рўйхатидан ўтиши лозим. Шунингдек, ушбу фармонга кўра якка тартибдаги тадбиркорлар сифатида давлат рўйхатидан ўтмасдан фаолият олиб бораётган жисмоний шахслардан тегишли фаолият тури бўйича белгиланган ставкадан келиб чиқиб ҳисобланган бир йиллик миқдордаги қатъий белгиланган солиқни бир йўла ундириш тартиби бекор қилинди. Мазкур фармон ижросини таъминлаш борасида амалга оширилаётган ишлар самараси ўлароқ, жорий йилнинг ўтган даврида туманда 47 нафар фуқаронинг 162 113 минг сўмлик қарзи ҳисобдан чиқарилди.
Жорий йилнинг январь-февраль ойларида туман прокуратураси ҳамда прократура ҳузуридаги иқтисодий жиноятларга қарши курашиш департаменти ходимлари билан ҳамкорликда олиб борилган профилактика тадбирлари натижасида 97 нафар фуқаронинг тадбиркорлик фаолиятини тиклашига кўмаклашилди. 390 нафар фуқаро тадбиркор сифатида двлат рўйхатидан ўтиб, қонуний фаолиятини йўлга қўйилишига кўмаклашилди. Шуни ҳам таъкидлаш лозимки, мазкур чора-тадбирлар замирида тадбиркорлик субъектларининг фаолиятини ҳар томонлама қўллаб-қувватлаш, юртдошларимизнинг иқтисодий фаровонлигини таъминлаш, инсофли солиқ тўловчилар сафини янада кенгайтиришдек эзгу мақсадлар турибди.
Абдуғофур АЗИМОВ,
туман ДСИ Солиқ мажбуриятлари
ҳисобиниюритиш бўлими бошлиғи.
