Мен ўн йилдан буён пенсиядаман. Жорий йилнинг 12 декабрида Президентимизнинг, 2019 йилнинг 1 январидан бошлаб пенсияни ҳисоб-китоб қилишда энг кам ойлик иш ҳақининг саккиз баробари эмас, ўн ўн баробаригача ҳисобланиши белгиланган Фармони эълон қилинди. Мен ҳозирда 340.000 сўм пенсия олаяпман. Ушбу Фармонга кўра менинг пенсия пулим ошадими? Саволимга аниқлик киритилишида ёрдам беришларингизни сўрайман.
Ҳамроқул МАҲМУДОВ,
нафақахўр.
Президентимизнинг ушбу Фармони матбуотда эълон қилингач, таҳририятимизга шундай саволлар билан мурожаат қилувчилар сони ортганлигини инобатга олиб, бу каби саволларга, Фармоннинг мазмун-моҳияти ҳақида ўқувчиларга батафсил, содда қилиб тушунча беришни сўраб Пенсия жамғармаси туман бўлими бошлиғи ўринбосари Норбўта ЭРМАТОВга мурожаат қилдик.
Н. ЭРМАТОВ: - Юқоридаги каби саволлар билан Пенсия жамғармаси туман бўлимига ҳам бир нечта пенсионерлар ва ижтимоий нафақа олувчилар мурожаат қилишмоқда. Агарда ўқувчи матбуотда эълон қилинган Фармонни диққат билан ўқиб, мулоҳаза қилса, саволига ўзи жавоб топади. Фармонда таъкидланишича, пенсия тайинлашда иш ҳақининг максимал миқдорини энг кам ойлик иш ҳақининг саккиз баробаридан ўн баробаригача ошириш белгиланган. Масалан: пенсионер Сабура Жўраева 2018 йил ноябрь ойидан пенсияда. Унинг умумий иш стажи 41 йилни ташкил этади. Иш стажининг охирги ўн йилидан кетма-кетликда 5 йилини олиб ҳисобланганда, ўртача иш ҳақи2.997.261 сўмни ташкил қилди. Ўтган йилги энг кам иш ҳақининг саккиз баробари 1.621.840 сўмни ташкил қилган. Демак, у кишининг ўртача ойлик иш ҳақи ўртача саккиз баробардан кўп. Шу боисдан унга пенсия тайинлаш миқдори 892.012 сўм қилиб белгиланди ва ортиқча иш стажи учун 21 фоиз, яъни 340.586 сўм қўшилиб, унга тайинланган пенсия миқдори 1.232.598 сўм бўлган. Эндиликда Фармонга кўра бугунги кундаги ўртача иш ҳақидан келиб чиқиб ҳисоблаганда энг кам иш ҳақининг ўн баробари 2.027.300 сўмни ташкил этиб, пенсиянинг миқдори 1.115.015 бўлиб, унга қўшимча яна ортиқча 21 йил иш стажи учун 21 фоиз, яъни 425.733 сўм қўшилган ҳолда 2019 йилнинг 1 январидан бошлаб С. Жўраевага 1.540.748 сўм бўлди.
Яна бир мисол: пенсионер Алиқул Аззамов 2009 йил август ойидан буён пенсияда.Унинг умумий иш стажи 25 йил. Ҳақиқий ўртача иш ҳақи 1.201.862 сўм бўлиб, ҳисобга олинган миқдори ҳам 1.201.862 сўмни ташкил қилади. Шундан келиб чиққан ҳолда пенсиянинг тайинлаш миқдори 661.024 сўм бўлган. Ортиқча иш стажи учун 0 фоиз, 0.0. сўм. Фармонга кўра А. Аззамовнинг ўртача иш ҳақи саккиз баробардан кам бўлганлиги боисунинг пенсияси миқдори ўзгаришсиз қолдирилади.
Демак, Фармондан келиб чиқиб ҳисоб-китоб қиладиган бўлсак, пенсионер Ҳамроқул Маҳмудовнинг ҳам пенсияси миқдори ўзгаришсиз қолдирилади.
Суҳбатдош:Тўлқин ШЕРБОЕВ.
