уни давлат томонидан тўлаш тартиби белгиланди
Бугунги кунда хусусий ташкилотларда ишлаётган ходимларнинг меҳнат ҳуқуқлари давлат корхоналарида ишлаётган ходимларникидан кам кафолатланмаётганлигини кўришимиз мумкин.
Жумладан, Ўзбекистон Республикаси Вазирлар Маҳкамасининг 2022 йил 20 сентябрдаги "Давлат ижтимоий суғуртаси бўйича ҳомиладорлик ва туғиш нафақасини тайинлаш ҳамда тўлаш тартиби тўғрисида"ги 515-сонли қарори қабул қилиниб, хусусий ташкилотда ишлаётган ходимларга ҳомиладорлик нафақасини давлат томонидан тўлаб бериш тартиби белгилаб берилди.
Вазирлар Маҳкамасининг юқоридаги қарори ҳамда қарор асосида Давлат ижтимоий суғуртаси бўйича ҳомиладорлик ва туғиш нафақасини тайинлаш ҳамда тўлаш тартиби тўғрисида низом тасдиқланди. Низом билан бюджет ташкилотларидан бошқа барча юридик шахсларда 6 ой узлуксиз ишлаётган аёлларга ҳомиладорлик ва туғиш нафақасини тўлаш тартиби белгиланди.
Шу ўринда, нафақа Ижтимоий суғурта жамғармаси ҳисобидан фарзанд туғилгунигача минимал истеъмол харажатларининг 4 баравари (1 млн. 992 минг сўм) миқдорда берилади. Шунга кўра, юридик шахсларнинг нафақа тўлаш мажбурияти Жамғарма ҳисобидан тўланган нафақа миқдорига камайтирилади.
Меҳнатга лаёқатсизлик варақаси нафақани тайинлаш ва тўлаш учун асос бўлади. Меҳнатга лаёқатсизлик варақаси расмийлаштирилгандан 5 иш кунида маълумотлар масъул тиббиёт ходими томонидан "Тиббиёт" ахборот тизимига киритилади ва маълумотлар "Ягона реестр" тизимига юборилади.
"Ягона реестр" тизими томонидан нафақа тайинлаш ёки рад этиш ҳақида қарор қабул қилиниб асослантирилган ҳолда нафақа олувчининг телефонига СМС-хабар юборилади. Нафақа ойнинг 10-санасигача нафақа олувчининг пластик картасига ўтказиб берилади. Пластик карта бўлмаганида эса ойнинг 27-санасигача нақд кўринишда берилиши кўзда тутилган.
Бу эса хусусий ташкилот ходимларининг меҳнатга бўлган муносабатини ўзгартиришига ҳамда уларнинг меҳнат қонунчилиги таъминланишига пойдевор бўлиб хизмат қилади.
Шерзод БАҲРИДДИНОВ,
туман Адлия бўлими юридик хизмат кўрсатиш маркази бош юристконсульти.
